PM Xanana Anunsiu Rekrutamentu Foun Ba PNTL

Primeiru-Ministru Kay Rala Xanana Gusmão. Imajen/Rafa.tl

DÍLI, RAFA.tl– Primeiru-Ministru (PM), Kay Rala Xanana Gusmão, Kinta (19/03/2026), deside no anunsiu rekrutamentu foun ba kadetes Polísia Nasionál Timor-Leste.

Notísia Relevante: Relatóriu Polémika Rekrutamentu PNTL Sei Aprezenta Ba Konsellu Ministru

Hafoin halo enkontru semanál ho Prezidente Repúblika José Ramos-Horta iha Palásiu Prezidensiál, Xefe Governu anunsiu liu husi jornalista sira katak prosesu rekrutamentu ne’ebé halo tiha ona iha tinan 2025 hodi hamo polémika to’o ohin loron kansela total.

“Governu sei haré didi’ak rekomendasaun husi Polísia sira mai husi Austrália no Portugal no sira dehan katak, di’ak liu loke fila-fali foun, buat ida uluk ne’e  arkiva tiha hodi loke fila-fali. Ne’ebé loke fila-fali mak Ministru Interiór sei esklarese ba imi (jornalista-red),” Primeiru-Ministru Xanana Gusmão hateten.

Xanana esplika  sei iha faze tolu ba prosesu rekrutamentu foun;  primeiru hotu-hotu tuir faze ida, se mak lakon iha faze primeiru nia ba ona, la hanesan, segunda faze kala númeru menus ona, se mak lakon sai ona, pois ba terseira faze mak se mak lakon mós sai, ho nune’e, buat hotu-hotu bele transparénsia no justu.

“Ami deside ona, ida-ne’e mak ohin ha’u mai informa ba Prezidente Repúblika mós,” Xanana afirma.

Xefe Governu ne’e haktuir, Kuarta-feira, horseik, kadetes foun sira hahú halo manifestasaun hodi hasoru Ministru Interiór tanba ne’e mak horseik informa kedas hodi bolu Polísia Austrália, Portugal no sosiedade sivíl  hodi haré fali prosessu rekrutamentu ne’e.

“Ha’u mós informa ba Prezidente Repúblika, kona-bá  horseik no horibain rua iha  manifestasaun fali ona kona-bá prosesu  rekrutamentu kadetes foun PNTL nian. Ne’ebé ami horseik informa tiha ona ba ita-boot sira katak ami bolu husi Austrália, husi Portugal no mós partisipasaun sosiedade sivíl nian, ami ba haré didi’ak fali prosessu tomak rekrutamentu ne’ebé provoka kontestasaun barak,” Xanana hateten.

Hafoin partisipa iha Reuniaun Konsellu Ministru iha Palásiu Governu, Kuarta (18/03/2026), Ministru Interiór Francisco da Costa Guterres, hatete Komisaun Revizaun Rekrutamentu Polísia Nasionál Timor-Leste iha hela finalizasaun ba servisu verifikasaun no investigasaun, nune’e semana oin, sei aprezenta relatóriu ba Governu iha Reuniaun Konsellu Ministru.

Reportajen ekipa Rafa.tl