Relatóriu Polémika Rekrutamentu PNTL Sei Aprezenta Ba Konsellu Ministru

PNTL halo vizilánsia iha resintu Ministériu Interiór iha ámbitu asaun pasifiku kandetes PNTL no estudante sira iha UNTL, Kuarta (18/03/2026). Imajen/Rafa.tl

DÍLI, RAFA.tl– Ministru Interiór (MI), Francisco da Costa Guterres, Kuarta (18/03/2026), informa katak Komisaun Revizaun Rekrutamentu Polísia Nasionál Timor-Leste (PNTL) iha hela faze finál ba servisu verifikasaun no investigasaun ba polémika rekrutamentu ne’e, ho nune’e, semana oin sei aprezenta relatóriu ba Governu iha reuniaun Konsellu Ministru.

Notísia Relevante: PNTL Husu Kandidatu Polísia Foun Kumpri Lei Manifestasaun

“Husu kadetes foun sira labele ansi, husik Komisaun Revizaun sira halo servisu, depois komisaun sira ne’e mak sei fó rezultadu mai iha Governu no iha semana oin, sira bele hato’o ona relatóriu  mai Konsellu Ministru depois Governu foti desizaun tuir rekomendasaun Komisaun Supervizaun sira fó,” Ministru Interiór, Francisco da Costa Guterres ba jornalista iha Palásiu Governu.

Ministru Interiór hatutan Komisaun Revizaun  halo ona servisu hodi halo investigasaun ba lista kandidatu 400 ne’ebé iha no semana oin bele aprejznta ona ba iha governu.

Governante ne’e informa, komisaun sira nia servisu la’o naruk ona, sira asesu dokumentu sira, taka hotu, foti hotu xave sekretariadu rekrutamnetu nian, sira buka tuir ona dokumentu sira ne’ebé iha no loron hirak nia laran ne’e sei hakarek relatóriu ikus depois semana oin submete ba governu.

Ministru Interiór Francisco da Costa Guterres husu ba  kadetes PNTL foun sira atu mantein disiplina no pasiensia hodi hein rezultadu relatóriu husi Komisaun Revizaun.

“Ne’ebe ha’u husu ba sira kadetes foun ne’e hakarak sai Polísia sira tenke disiplina uitoan hodi hein desizaun ne’e, depois Governu foti desizaun tuir rekomendasaun ne’ebé mak komisaun ne’e fó, duke ita ba estrada la rezolve problema. Sira nia ezijénsia reklama ne’e mak hodi husu komisaun halo ne’e,” Ministru Francisco da Costa Guterres hateten.

Francisco da Costa Guterres promete bainhira Komisaun Revizaun nia investigasaun ba lista kandidatu ne’e mosu irregulariedade  komete husi ofisiál PNTL balun,  sei prosesa ba Ministériu Públiku.

Reportajen ekipa Rafa.tl