Problema iha Setór Saúde La’ós Foin Akontese iha Mandatu IX Governu Konstitusionál

Ministra Saúde, Elia A.A dos Reis Amaral. Imajen/Rafa.tl

DÍLI, RAFA.tl– Ministra Saúde (MS), Élia A.A. dos Reis Amaral, afirma  problema iha setór saúde la’ós foin akontese iha mandatu IX Governu Konstitusionál, maibé  desde governu anteriór nia tempu sempre enfrenta to’o agora.

Notísia Relevante: INFPM Enfrenta Stock Out Ai-Moruk Item 32%

Ministra Saúde, Élia A.A. dos Reis Amaral afirma hodi responde ba preokupasaun membru Parlamentu Nasionál ne’ebé sempre kestiona  númeru mortalidade iha Ospitál Nasionál Guido Valdares (HNGV), Ospitál Referal sira inklui iha sentru Saúde no klinika sira iha teritóriu nasionál.

Ministra Saúde informa, tuir Evarese ba Taxa Mortalidade Jerál (General Death Rate/GDR) no mós Taxa Mortalidade Neto (Net Death Rate/NDR) ne’ebé kada loron akontese iha HNGV liu-liu ba númeru mate isin ne’ebé kauza deit husi moras espesifiku ida ne’ebé análize hela hodi hasai mate-isin sira ne’ebé kauza husi fali buat seluk, númeru rua ne’e tuir númeru indikador taxa global liu-liu ba Taxa Mortalidade Jerál Timor-Leste seidauk ultrapassa 40% no mós Taxa Mortalidade Neto la ultrapassa husi 23% signifika ida-ne’e problema normal ka babain.

Liga ho intervensaun membru Parlamentu Nasionál nian ne’ebé kestiona  ho númeru bebé ne’ebé mate kada loron iha HNGV ns’in-30 iha fulan-ida nia laran, Ministra Élia Amaral, konsidera katak loron ida maka bebé ida lakon vida no sura to’o loron 30 mak na’in-30 lakon vida, ne’e tama iha kategoria normal.

“Ita-boot sira imajina de’it, se loron ida maka labarik mate ida de’it, multiplika to’o loron 30, labarik nain-30, maibe tuir evarese ba global nia nunka akontese hanesan ne’e,” Ministra Saúde Élia dos Reis Amaral informa  ba jornalista sira iha Palásiu Governu, Kuarta (18/03/2026).

Governante ne’e mós toma nota ba iha preokupasaun hirak ne’e, liu-liu liga ho fasilidade no atendimentu sira iha HNGV ne’ebé labele responde másimu ba iha pasiente sira nia preokupasaun.

“Agradese ba preokupasaun, situasaun kondisaun HNGV maka hanesan ne’e ona, durante tinan naruk nia laran situasaun hanesan ne’e, hanesan limitasaun kama, ita hotu akompaña. Nune’e maka IX Governu atu bele hadia di’ak liután ba iha fasilidade saúde sira, liu-liu ekipamentu modernu no mós kapasitasaun ba iha pesoál saúde sira,” Nia hateten.

Liga ho fasilidade sira ne’ebé dadaun ne’e sai preokupasaun ba pasiente sira, Ministériu Saúde kontinua esforsu atu bele finaliza lalais konstrusaun sira iha HNGV, liu-liu sala Pediatria ne’ebé dadaun ne’e atinje ona ba iha 78% no iha tempu badak bele finaliza.

Iha fatin hanesan jornalista sira mós tenta konfirma ho governante ne’e liga ho stoke out item ai-moruk 32% iha Institutu Nasionál Farmásia no Medikamentu  (INFPM), maibé Ministra Saúde Élia dos Reis Amaral la konsege  resposta.

Reportajen ekipa Rafa.tl