Segunda, MI Aprezenta Ba PM Xanana Lista Kandidatu Komandante Jerál no Segundu Komandante Jerál PNTL

Ministru Interiór, Francisco da Costa Guterres. Imajen/Rafa.tl

DÍLI, RAFA.tl– Ministru Interiór (MI), Francisco da Costa Guterres, sei aprezenta uluk kandidatu Komandante Jerál no Segundu Komandante Jerál Polísia Nasionál Timor-Leste (PNTL) ba Primeiru-Ministru Kay Rala Xanana Gusmão, iha Segunda (23/06/2026), molok aprezenta ba Konsellu Ministru atu deside.

Notísia Relevante: Semana Oin, Ministru Francisco Guterres Aprezenta Proposta Kandidatu Komandante Jerál PNTL Ba Konsellu Ministru

Ministru Interiór Francisco da Costa Guterres, Kuarta (18/03/2026), iha Palásiu Governu, hateten Kuarta-feira, 25 fulan-Marsu ne’e,  sei aprezenta Komandante Jerál ba konsellu Ministru aprova, ho nune’e, proposta kandidatu Komandante Jerál ho Segundu Komandante Jerál PNTL sei enkamiña uluk ba PM Xanana Gusmão.

“Segunda ne’e, ha’u konsulta tiha ho Primeiru-Ministru, ha’u foin submete ba iha Konsellu Ministru,” Francisco da Costa Guterres informa.

Nia konsidera kandidatu na’in-rua ne’e iha kapasidade no esperiénsia atu lidera instituisaun Polísia Nasionál Timor-Leste (PNTL) no daudaun ne’e, Ministériu Interiór prepara hela legalidade ho buat hotu.

Ministru Interiór informa, hela tan loron tolu atu halo promosaun deviza ba Ofisiál Susperiór hamutuk na’in-63, ne’ebe sei prezide husi Primeiru-Ministru Kay Rala Xanana Gusmão, iha sentru Formasaun Akademia PNTL, Comoro.

Promosaun ne’e tuir lei organiku PNTL nian, ne’ebé iha ofisiál na’in-lima maka sei tama ba reforma iha tinan oin no balu sei ba adidu iha nasaun seluk.

Fó hanoin fali katak mandatu Komandante Jerál atual Komisáriu Jerál Polísia Henrique da Costa no Segundu Komandante Jerál PNTL Komisáriu Pedro Belo, sei termina iha  loron 27 fulan-Marsu 2026.

Reportajen ekipa Rafa.tl