BCTL Klarifika Moeda Sentavu 200 Nafatin Válidu iha Tranzasaun Merkadoria

BCTL ho MCI realiza konferénsia imprensa konjuntu iha salaun enkontru BCTL, Díli, Sesta (13/03/2026). Imajen/Rafa.tl

DÍLI, RAFA.tl- Vise Governadora Banku Sentrál Timor-Leste (BCTL, sigla portugés), Sara Lobo Brites, klarifika ba públiku katak, moeda sentavu 200 nafatin válidu iha tranzasaun merkadoria no atividade ekonómiku sira.

Notísia Relevante: BCTL Identifika Moeda Falsu Sentavu 200

“Ha’u hakarak informa ba hotu-hotu katak, osan ne’ebé BCTL  emite sentavu 200 ne’e, osan ofisiál no nia tenke kontinua sirkula, tanba ne’e ita-nia osan laiha razaun atu rejeita. Osan ne’e, osan ne’ebé orijinál ne’ebé mak maioria sirkula iha teritóriu Timor tomak,” Vise Governadora BCTL, Sara Lobo Brites  informa liu husi konferénsia imprensa konjuntu ho Ministériu Komérsiu no Industria (MCI),  iha salaun enkontru BCTL iha Díli, Sesta (13/03/2026).

Sara Lobo Brites hatete, seidauk iha despaixu ofisiál ne’ebé determina atu para ka bandu uza moeda sentavu 200. Tan ne’e, sidadaun sira bele kontinua uza moeda sira ne’e atu halo tranzasaun iha merkadu, loja no fatin seluk.

BCTL hakarak informa ba sidadaun sira katak, iha publikasaun iha loron 04 fulan-Marsu ne’e kona-bá sirkulasuan moeda sentavu 200 falsu, ho intensaun atu informa ba negosiante ho sidadaun sira atu vizilante, tanba iha duni informasaun, no BCTL deteta duni moeda ne’ebe mak falsu. Tanba ne’e, Banku Sentrál nia obrigasaun tenke informa ba públiku, maibé la’ós atu informa hakarak hetan fali reasaun ida la simu fali osan ne’ebé mak orijinál.

Kona-bá informasaun ne’ebé iha, sosiedade no loja na’in balun ne’ebé lakohi simu moeda sentavu 200 husi komunidade ne’e atu kontinua simu tuir prosedimentu no verifikasaun osan tuir saida mak BCTL anúnsia ona ba públiku.

“Sidadaun sira ba sosa sasán iha loja sira deside la simu fali osan sira ne’ebé ita nia sidadaun sira lori. Ida-ne’e komportamentu ne’ebé mak la los, seidauk iha informasaun ida katak osan moeda sentavu 200 ne’e labele simu. Sentavu 200 ne’e vale no legál, kontinua tenke sirkula nafatin iha ita nia rai laran,” Vise Governadora BCTL ne’e afirma.

Iha fatin hanesan Diretór Jerál Ministériu Komérsiu no Indústria (MCI, sigla portugés), Elias de Jesus Fátima, fó atensaun komunidade no negosiante sira, hanesan loja no supermerkadu sira atu labele jeneraliza osan moeda sentavu 200, hodi la simu iha atividade tranzasaun sira.

“Ami koordena nafatin ho BCTL, atu bele fó sosializasaun ba ita nia komunidade sira no negosiante sira, utiliza nafatin moeda ne’ebé mak espalla iha komunidade nia leet. Garante katak osan sentavu 200 ne’e orijinál duni, no ita nia nasaun utiliza to’o ohin loron, ne’ebé laiha razaun ba komunidade sira atu la simu osan ne’e,” Elias de Jesus hateten.

BCTL mós husu ba públiku atu nafatin konfia informasaun ofisiál ne’ebé hato’o husi BCTL, no labele halo interpretasaun sala ba informasaun ne’ebé la iha konfirmasaun ofisiál.

Molok ne’e, Kuarta (04/03/2026),  BCTL konfirma katak, BCTL servisu hamutuk ho autoridade seguransa kompostu husi Polísia Sientifiku  Investigasaun Kriminál (PCIC) ho Diresaun Servisu Investigasaun Kriminál (DSIK) Polísia Nasionál Timor-Leste (PNTL) indentifika sirkulasaun moeda falsu sentavu 200 ho serie tinan 2017 iha teritóriu Nasionál.

BCTL ho autoridade Timor-Leste nian sira bolu atensaun no husu ba komunidade iha teritóriu nasionál atensaun didi’ak ba osan falsu sentavu 200 ho serie tinan 2017.

Reportajen Ekipa Rafa.tl