PNTL Rejista Motór 23 Lakon iha Díli

Motór sira ne'ebé Polísia Seksaun Tránzitu halo apreensaun tanba laiha dokumentu no balun komete infrasaun ba kódigu estrada. Imajen/Rafa.tl

DÍLI, RAFA.tl– Durante fulan-Janeiru to’o Fevereiru, tinan ne’e,  Komandu Polísia Nasionál Timor-Leste (PNTL) Munisípiu Díli, liu husi Seksaun Tránzitu rejista motór hamutuk 23 lakon kauza husi ema na’ok.

Notísia Relevante: Polísia Tránzitu Munisípiu Díli Menus Rekursu Umanu

“Motorizada sira ne’ebé lakon ema mai halo deklarasaun iha Polísia Tránzitu nia fatin, na’in mai halo keixa para atu halo kanselamentu iha Diresaun Nasionál Transporte no Terrestre (DNTT) iha fulan-Janeiru motór lakon iha 21, no iha fulan-Fevereiru, iha  motór 12 mak lakon. Signifika motór lakon iha sidade Díli ne’e aas,” Xefe Seksaun Tránzitu Munisípiu Díli, Superintendente Assistente Polísia Afonso da Silva ba Rafa.tl iha nia knaar fatin, Caicoli, Díli Kuarta (11/03/2026).

Superintendente Assistente Polísia Afonso da Silva, hatutan, durante tinan ne’e, Polísia Tránzitu Munisípiu Díli halo operasaun hodi pasa revista motórizada sira ne’ebé halo movimentu iha Díli konsege prende barak, maibé motór balun laiha dokumentu, husu sira ne’ebé motór lakon atu mai iha tránzitu nia fatin hodi haré.

“To’o agora sira ne’ebé halo keixa iha fulan-Janeiru ho fulan-Fevereiru ne’e seidauk iha na’in ida mai fó hatene hetan ona ka seidauk. Polísia nia parte avizu hela ba na’in, ami halo pasa revista loron-loron, ami prende motór, mai iha ami nia fatin, hodi haré, se motór iha, bele hato’o ba iha Komandu Polísia hodi foti fila-fali,” Nia hateten.

Polísia Tránzitu Díli halo kolaborasaun ho parte Diresaun Nasionál Transporte no Terrestre  (DNTT) atu halo blokeadu ba motór hirak ne’e nia dokumentu, inklui servisu hamutuk ho  ekipa sekreta sira atu buka tuir motór sira ne’ebé lakon, maibé to’o agora Polísia sira seidauk hetan fila-fali motór hirak ne’e.

Seksaun Tránzitu Munisípiu Díli mós husu ba sidadaun sira atu hametin seguransa ba motór, hanesan tau kadeadu seguru, la husik xave iha motór, no evita para iha fatin ne’ebé la iha iluminasaun iha kalan.

Polísia mós kontinua halo operasaun no patrullamentu atu prevene krime furto veíkulu no buka hetan fila-fali motór sira ne’ebé lakon.

 Reportajen ekipa Rafa.tl