Rezultadu Investigasaun Kazu Overstay, Pessoál Servisu Migrasaun La Komete Iregularidade

Diretora Ezekutiva Servisu Migrasaun, Superintendente-Xefe Polísia, Natércia Eufrásia Soares Martins. Imajen/Rafa.tl

DÍLI, RAFA.tl- Ekipa investigasaun konjuntu  ne’ebé forma husi Ministériu Interiór ho Servisu Migrasaun Timor-Leste ba kazu overstay sidadaun Indonézia ne’ebé viral iha mídia sosiál Facebook konklui ona.

Notísia Relevante: Servisu Migrasaun Suspende Provizóriu Pessoál Ne’ebé Envolve iha Kazu Overstay WNI Feto Ida Sai Virál iha Mídia Sosiál

Husi investigasaun profunda ne’ebé envolve parte sira, hanesan sasin, pessoál Servisu Migrasaun ho naran Olivio Pinto, inklui envolve adidu sira ne’ebé koloka iha postu fronteira terreste ho autoridade Indonézia rasik, hodi buka tuir dokumentu sidadaun Indonézia ho naran Dirsie Graciela Lopes, ba prosesu kazu overstay ne’e, hatudu katak medida sira ne’ebé pessoál servisu Migrasaun Olivio Pinto foti hasoru sidadaun Indonézia ne’ebé nia pasaporte mate ka overstay ne’e la komete iregularidade.

Iha prova dokumentu pasaporte sidadaun Indonézia ho naran Dirsie Graciela Lopes, konsta katak, pessoál Servisu Migrasaun, Olivio Pinto, la aplika sansaun ruma, maibé tau karimbu Alerta iha sidadaun Indonézia Dirsie Graciela Lopes nia  pasaporte.

Karimbu alerta iha pasaporte ba sidadaun estranjeiru sira ne’ebé overstay indika violasaun ba lei Migrasaun nian ne’ebé grave, ne’ebé bele rezulta multa administrativa tuir regulamentu timor-Leste nian puvolta US$150.00. Ida-ne’e hanesan sinál alerta ida atu kesar kedas, selu multa, no sai husi Timor-Leste hodi evita tan sansaun legál sira.

Diretora Ezekutiva Servisu Migrasaun, Superintendente-Xefe Polísia, Natércia Eufrásia Soares Martins,  Kuarta (11/03/2026), fó sai ba públiku liu husi jornalista sira, katak  kazu pessoál Servisu Migrasaun Olivio Pinto ne’ebé fasilita sidadaun Indonézia Dirsie Graciela Lopes ne’ebé overstay tau duni karimbu alerta, nune’e Olivio Pinto,  la komete iregularidade.

Superintendente-Xefe Polísia, Natércia Eufrásia Soares Martins esplika, bainhira sira simu informasaun husi mídia kona-bá kazu overstay sidaduan Indonézia nian ne’e, sira-nia parte halo kedas asaun imediatamente forma ekipa ida halo ona  investigasaun.

“Iha prosesu investigasaun ne’e ita foti informasaun, ita rekolla dadus sira hotu, evidénsia husi testemuña no mós evidénsia fiziku hanesan sistema no pasaporte rasik, liu husi koordenasaun Servisu Migrasaun nian ho ita-nia parseiru husi autoridade Indonézia, inklui esforsu husi adidu ne’ebé koloka iha fronteira konsege hetan individu ne’e nia pasaporte no mós karimbu ne’ebé tau bainhira nia sai husi teritóriu Timor-Leste liu husi postu integradu fronteira Terrestre Batugade, Postu Administrativu Balibo, Munisípiu Bobonaro,” Natércia Eufrásia Soares Martins informa .

Durante investigasaun, Natércia Martins, hatutan evidénsia sira ne’ebé foti no mós informasaun husi individu sira ne’ebé mak haré, prova katak pessoál Servisu Migrasaun Olivio Pinto hola desizaun tuir hela regra.

“Iha sistema, bainhira sidadaun ida nia konfesa katak nia la iha forsa ekonomia atu bele multa ba ninia overstay ka viza ne’ebé mate ona, ita labele tahan nia iha ita nia rai, maibé ita fasilita nia tau sinál ruma, alerta iha nia sistema no ba pasaporte,” Natércia Martins hateten.

Tuir Lei, depois liu tinan rua ka tolu mak bele tama Timor-Leste no  bainhira sidadaun ne’ebé nia pasaporta tau karimbu alerta no iha sistema tau hela alerta, nune’e bainhira sidadaun ne’e tama fali mai mós  tenke halo pagamentu hafoin tama, tanba iha nia sistema no pasaporte iha ona sinál alerta.

Evidénsia ne’ebé rekolla indika katak sidadaun Indonézia  ho identidade Dirsie Graciela Lopes nia pasaporte iha alerta sai nian, katak nia hetan multa, maibé nia la multa, nune’e bainhira nia tama fali mai Timor-Leste nia tenke selu fali multa no mós iha sistema alerta.

Durante iha prosesu investigasaun ne’e, autoridade sira  suspende pessoál Servisu Migrasaun Olivio Pinto husi nia servisu, katak labele halo lai nia servisu, para nia bele koopera ho prosesu investigasaun, maibé prova hatudu nia la komete iregularidade iha ne’ebá, nia sai fali vítima, tanba desizaun ne’ebé halo tuir Leí hodi suspende nia, no nia ofende liután, entaun pessoál refere sira fó motiva atu nia kontinua fali servisu.

Diretora Ezekutiva Servisu Migrasaun, Superintendente-Xefe Polísia, Natércia Eufrásia Soares Martins subliña, tuir lolós sidadaun Indonézia, Dirsie Graciela Lopes refere selu multa overstay ka viza mate ne’e ho osan montante US$150.00.

Reportajen ekipa Rafa.tl