Inundasaun iha Postu Fronteira Batugade Rezulta Mákina Rua Servisu Alfándega Nian Avaria

Korpu Bombairu Munisípiu Bobonaro hamutuk ho autpridade sira iha Postu Fronteira Batugade hamos arredór no fatin sira ne'ebé asfeta inundasaun. Imajen/Rafa.tl

DILI, RAFA.tl – Inundasaun ne’ebé akontese iha Postu Fronteira Motain-Indonézia no Postu Fronteira Batugade, Postu Administrativu Balibo, Munisípiu Bobonaro, Domingu (08/03/2026), rezulta mákina rua Servisu Alfándega nian avaria.

Notísia Relevante: Udan-Boot Hamosu Inundasaun iha Postu Fronteira Batugade ho Motain

Mákina rua ne’ebé avaria ne’e, ida mak makina x-ray bagajen ho marka Nuctech ho mákina Metler Toledo.

Mákina Nuctech X-ray baggage scanner halo eskaneamentu no deteta sasán perigozu ka bandu sira (arma, esplozivu, droga, no kontrabandu) iha mala/saku laran lahó loke sira. Dispozitivu ida-ne’e uza teknolojia raiu-X hodi produz imajen sira ne’ebé detallu hosi konteúdu bagajen nian, no dala barak uza iha aeroportu sira,  postu fronteira terrestre, estasaun komboiu nian, portu sira, no instalasaun lojístika sira hodi garante seguransa.

Mákina Mettler Toledo uza ba pesa ho presizaun, análize amostra, no inspesaun industriál iha laboratóriu sira, farmaséutiku sira, no retallu.

Diretór Alfándega Munisípiu Bobonaro, Nuno Nogueira,  Segunda (09/03/2026), informa ba Rafa.tl liu husi telefone katak, autoridade aduaneira de Timor-Leste  ka Alfándega iha Postu Fronteira Batugade, kontinua halo atendimentu ba utilizadór sira iha Postu Fronteira Batugade ho sistema manual, tanba mákina rua ne’ebé normalmente uza ba prosesu servisu Alfándega avaria.

Nuno Nogueira informa inundasaun ne’ebé akontese iha Domingu madrugada, hale’u tuku 03:00 to’o tuku 05:00 dadér Otl, lori bee tama ba instalasaun servisu nian hodi estraga ekipamentu eletróniku balun, inklui mákina servisu nian. Tanba ne’e, pesoál Alfándega  ne’ebé destakadu iha Postu Fronteira Batugade tenke halo atendimentu manuál ba dokumentu importasaun no exportasaun atu garante movimentu merkadoria no transporte kontinua la’o.

“Domingu loron tomak, servisu hamutuk ho parte korpu Bombeiru  ho instituisaun relevante sira iha Postu Fronteira Batugade, inklui autoridade militár Indonézia nian iha Postu Fronteira Motain  konsege hamós tahu no bee nalihun tama iha fatin instalasaun servisu Postu Fronteira rua ne’e nian. Ami halo koordenasaun ho parte Indonézia iha Postu Fronteira Mota-ain  hamutuk oinsá halo normalizasaun ba iha  mota ne’ebé sai kauza ba inundasaun,”  Diretór Alfándega Munisípiu Bobonaro, Nuno Nogueira informa.

Nuno Nogueira afirma daudauk ne’e ekipa Alfándega ne’ebé destakadu iha Postu Fronteira Mota-ain-Indonézia ho Postu Fronteira Batugade, Timor-Leste nian, kontinua halo atendimentu ho manual.

Nuno Nogueira hatutan,  mákina  rua ne’ebe avaria ne’e hato’o ona informasaun  ba Alfándega nasionál atu haruka parte tékniku sira hodi haré, nune’e bele halo manutensaun hodi bele utiliza fali halo servisu iha tempu badak.

Inundasaun iha Postu Fronteira Batugade rezulta mós dokumentu eskritóriu nian balun bee hoban, inklui loja sira-nia sasán  barak mak aat tanba bee hoban dodok.

Husi parte Autoridade Postu Integradu Fronteira Motain-Indonézia nian, hasai ona notifikasaun ba públiku relasiona ho inundasaun iha Domingu, 8 Marsu 2026, ne’ebé hamosu interrupsaun téknika sira ba instalasaun inspesaun sira iha postu kontrolu Mota-ain, hodi fó sai katak iha Segunda, 09 fulan-Marsu ne’e, atividade esportasaun Indonézia mai Timor-Leste suspende temporariamente.

Maske nune’e, atendimentu públiku sira hanesan veíkulu privadu no ekipamentu pezadu (ALBM) bele liu nafatin ho mós atividade tránzitu sira seluk kontinua la’o hanesan bai-bain liu hosi Postu Fronteira Terrestre  Mota-ain-Indonézia no Batugade, Timor-Leste.

 Ekipa Reportajen Rafa.tl