ETO Garante Stock Kombustível Sufisiente Ba Konsumidór sira

Estasaun kombustivel ETO iha Mandarin, Dili. Imajen/Rafa.tl

DILI, RAFA.tl– Xefe Ezekutivu (CEO, sigla inglés)  grupu empreza Esperança Timor Oan (ETO), Nilton Telmo Gusmão dos Santos,  informa ETO-Group garante stock kombustível sufisiente hodi atende kliente no konsumidór sira, maske oras ne’e akontese funu  iha Médiu Oriente entre Estadus Unidus Amérika no Israel ho Iraun.

Na’in ba  ETO-Group, Nilton Telmo Gusmão do Santos, ba jornalista sira iha City-8, Díli, Kinta (05/03/2026), haktuir  maske  funu iha Médiu Oriente entre Israel, Estadus Unidus Amérika ho Iraun, la fó impaktu ba kombustível iha Timor-Leste, tanba dau-daun ne’e stock kombustível husi ETO sei sufisiente.

“Stock agora dau-daun ita laiha problema, tanba bainhira ita Taça da Liga finál iha Sábadu kalan, ha’u toba, iha Domingu dadér, ha’u ba kedas Singapura hodi ba ko’alia ho ema, tau prioridade Timor hanesan mós prioridade ida ne’ebé sira tenke fó atensaun atu ita bele lori kombustível mai ita-nia rai, tanba ita hatene, ne’e la’ós novidades, funu Iraun, iha Média Oriente ne’e funu ida ne’ebé sei lori impaktu boot ba atividades petrolíferu mundu tomak, tanba mina matak, refinaria barak mak  depende ba mina matak husi país Médiu Oriente, tanba ne’e mak  klaru, se iha funu prolongadu ida talvez  bele fó problema, mais ha’u fiar kualker krize sempre iha nia solusaun, ne’ebé agora dau-daun ita lalika pániku, momentu ha’u ba Domingu, ita iha konfirmasaun ona katak, ita sei iha tan mina iha loron 09 fulan-Marsu, Ró ida mai  atu asegura ita-nia  ba fulan-tolu ka fulan-haat  ba oin, ita laiha problema,” Nilton Telmo Gusmão dos Santos hateten.

CEO ETO-Group ne’e hatutan, nia halo ona komunikasaun ho fornesedór kombustível, atu nune’e, bele antisipa bainhira funu iha Médiu Oriente ne’e sai manas liután.

“Ita nia situasaun di’ak hela, maibé la signifika katak, situasaun pior ita atu di’ak de’it, klaru ita mós sei bele  hetan impaktu, maibé por-enkuantu ita iha situasaun ida normál hela, ita kontinua komunika di’ak ho ita nia fornesedór sira, atu bele asegura kombustível ba ita-nia rai, atu nune’e, ita nia atividade sira ne’ebé ita halo iha ita-nia rai labele iha implikasaun ruma tanba de’it falta kombustível,” Nia subliña.

Nilton Telmo Gusmão dos Santos preukupa  mós ho funu iha Médiu Oriente, maibé optimista tanba nia fiar katak,  saida de’it mak akontese sempre iha nia solusaun.

Reportajen ekipa Rafa.tl