PNTL Deskobre Identidade Suspeitu Hatama Sigaru Ilísitu Marlboro Kaixa 50

Portavoz Interinu PNTL, Superintendente Asistente Polísia, Mouzinho Correia relata informasaun semanal ne’ebe akontese iha territóriu Timor durante semana rua nia laran. Imajen/Mídia MI

DILI, RAFA.tl – Polísia Nasionál Timor-Leste (PNTL) liu husi Servisu Investigasaun Kriminál no Servisu Sekreta, deskobre ona identidade suspeitu prinsipál hatama sigaru ilísitu Marlboro kaixa 50 liu husi dalan illegál.

Notísia Relevante: PNTL Asegura Sigaru Marlboro Ilegál Karton 389

Daudaun ne’e Polísia hein hela karta mandadu husi Ministériu Públiku (MP) hodi halo buska no atuasaun ba suspeitu sira ne’ebé identifikadu.

Portavós Interinu Komandu Jerál PNTL, Superintendente Asistente Polísia Mouzinho Tavares Correia, hateten PNTL halo ona identifikasaun ba  suspeitu  na’in-rua, hanesan motorista no karreta na’in, ne’ebé Polísia Diresaun Servisu Investigasaun Kriminál (DSIK) mós deskobre ona suspeitu ba sigaru ilísitu marka Marlboro kaixa 50 tanba ne’e sei hein karta mandadu husi Ministériu Públiku (MP) atu halo buska no atuasaun.

“Iha ne’ebá ita halo identifikasaun ba ema na’in-rua; primeiru ba motorista no karreta na’in, enkuantu suspeitu ne’e iha ona indisiu ruma, maibé ita seidauk hetan, prosesu la’o hela, espera iha tempu badak ita bele hetan. Maibé, nia identidade ita hetan ona,” Superintendente Asistente Polísia Mouzinho Tavares Correia ba jornalista sira iha Ministériu Interior,  Díli, Kinta (05/03/2026).

Portavós Internu Komandu Jerál PNTL ne’e hatutan kazu ne’e Polísia Diresaun Servisu Investigasaun Kriminál aprejenta ona ba Ministeriu Publiku, hein despaixu mandadu, nune’e bele halo buska no atuasaun ba fatin no autór ba sigaru illegál ne’e.

“Ita rekomenda ona ba autoriedade judisiál hodi bele hasai mandadu ruma hafoin ita bele halo buska,” Superintendente Asistente Polísia Mouzinho Tavares Correia hateten.

Portavós Komandu Jerál PNTL subliña sira-nia atividade halo negosiu ba sigaru ilísitiu ne’e  dala barak ona, ho modu ne’ebé hanesan, tula husi armajen depois transfere ba sira ne’ebé hein atu simu sigaru ne’e iha dalan-dalan. Nune’e bele desvia husi autoriedade seguransa.

Reportajen ekipa Rafa.tl