Abríl, Hahú Rekrutamentu Juri Ba Kargu Juís STJ-TR

Prezidente Komisaun Rekrutamentu no Selesaun ba Kargu Juís, Avelino Coelho ho ekipa hasoru malu ho PM Xanana Gusmão iha Palásiu Governu, Segunda (02/03/2026). Imajen/Rafa.tl

DILI, RAFA.tl– Komisaun Rekrutamentu no Selesaun ba  Kargu Juís,  Segunda (02/03/2026), informa  ba Primeiru-Ministru (PM), Kay Rala Xanana Gusmão, katak   prosesu rekrutamentu juri ba kargu Juís  Supremu Tribunál Justisa (STJ) no Tribunál Rekursu (TR) sei hahú iha fulan-Abríl 2026.

Prezidente Komisaun Rekrutamentu ba Kargu Juís, Avelino Coelho, ba jornalista sira iha Palásiu Governu, hatete, sira-nia parte hasoru malu ho Primeiru-Ministru Kay Rala Xanana Gusmão, hodi halo esplikasaun ba atividade ne’ebé sei hala’o dezde simu knaar nu’udar komisáriu ba komisaun rekrutamentu no selesaun ba Juís Supremu Tribunál Justisa no Tribunal Rekursu.

Nia informa, tuir lejislasaun presiza aprova dokumentu balun hafoin tama ba rekrutamentu juri ida, ne’e mak mai halo espozisaun ho Xefe Governu ba atividade ne’ebé mak halo ona.

“Mai halo espozisaun ba Primeiru-Ministru kona-bá atividade ne’ebé mak halo tiha ona, aprovasaun, rekrutamentu de avaliasaun, rejimentu internu, profisional de juri no ano de atinzi dadus. Ne’ebé ami halo hela, ohin aprezentasaun rona mós Primeiru-Ministru nia ideia, opiniaun no mós ninia sujestaun ba ita-nia prosesu ida-ne’e,” Avelino Coelho esplika.

Prezidente komisaun ne’e hatutan, tuir atividade ne’ebé mak aprova,  fulan ida ba aprovasaun dokumentus ne’ebé mak lejislasaun ne’e husu, fulan-Abríl mak foin hahú prosesu rekrutamentu ba juri entre na’in tolu ka lima, hofoin juri sira prontu ona mak foin loke vaga ba konkursu, ba Supremu Tribunál Justisa vaga ba ema na’in hitu no ba Tribunál Rekursu ba ema na’in-sia (9).

“Agora atu tuir konkursu ba Supremu Tribunál Justisa juizes hotu-hotu ne’ebé mak iha ona tinan 10, hahú halo knaar nu’udar Juís. Ba Jurista, Advogadu, Professor direitu sira mós bele tuir konkursu ba Supremu Tribunál Justisa, mais tenke iha esperiénsia profesionál tinan 15, sei loke hafoin rekrutamentu juri. Hanesan ba Defensór, Prokuradór da Repúblika mos bele tuir hotu,” nia tenik.

Avelino Coelho haktuir, tuir lei presiza juri tenke Juís Konselleiru, maibé Estadu Timor-Leste tinan  24 ona  seidauk iha Juís Konselleiru, tanba ne’e mak lejislasaun iha parte tranzisaun ne’e fó dalan atu juri sira ne’e maizumenus iha kriteira rua, tenke husi país ne’ebé mak tradisaun sigilista no lian offisiál portuges, tanba ne’e juri sira sei mai husi liur, hodi nune’e labele du’un malu no deskonfia malu.

Tuir planu, atividade ne’ebé komisaun halo, entrega ba Primeiru-Ministru prevé katak entre loron 20 fulan-Agustu ka posibilidade  loron 28 fulan-Setembru 2026  bele  estabelese ona Supremu Tribunál Justisa.

Reportajen ekipa Rafa.tl