DNTT ho PNTL La Tolera Menoridade Konduz Scooter iha Estrada Públiku

Minoridade ida ho livre konduz scooter iha estrada públiku. Imajen/Rafa.tl

DILI, RAFA.tl- Diresaun Nasionál Transporte no Terrestre (DNTT)  ho Polísia Nasionál Timor-Leste (PNTL), Diresaun Tránzitu Seguransa Rodoviária Nasionál,   la tolera labarik sira ne’ebé konduz (lori) motór elétriku ka Scooter iha estrada públiku, tanba bele hamosu risku ba seguransa tranzitu.

Notísia Relevante: Polísia Sei Halo Apreensaun Bá Minoridade Sira Konduz Scooter

Diretora Nasionál Transporte no Terrestre, Maria Antónia Vitor da Costa, hateten uza motór elétriku ka scooter presiza tuir regra tránzitu no idade mínimu ne’ebé determina ona tinan 16 ba leten. Labarik sira ne’ebé seidauk iha idade apropriadu no laiha lisensa la permite lori veíkulu iha dalan públiku.

“Komunikadu konjunta mós ami fó sai tiha ona, atu nune’e, husu ba komunidade sira, menoridade labele konduz siklu motór (scooter) iha estrada públiku, tanba bele fó ameasa ba labarik sira nia vida no mós perturba movimentasaun rodoviáriu,” Diretora DNTT, Maria Antónia Vitor da Costa,  informa ba jornalista sira iha nia knaar fatin, Balide, Díli, Kinta (26/02/2026).

Liu husi oportunidade ida ne’e, DNTT  husu Inan-Aman sira labele autoriza oan sira menoridade lori siklu motór sira ne’e iha públiku.

Nia hatutan,  sirkulár ne’ebé fó sai ona ne’e bandu menoridade sira atu utiliza motór scooter sira ne’e,  bainhira la kumpri maka DNTT hamutuk ho Polísia Tránzitu sei halo atuasaun.

“Ami sei halo passa revista (sweeping) no operasaun konjunta, tanba bai-bain ita haré iha Parlamentu Nasionál, Deputadu sira sempre foti ida-ne’e, ita haré katak minoridade ne’ebé mak lori motór eletrónika ka scooter fó risku boot ba sira-nia vida,” Mari Antónia Vitor da Costa hateten.

Kódigu Estrada ba númeru 3, artigu 120° dekretu lei nú. 6/2003, mensiona katak sira ne’ebé mak hakarak atu lori viatura sirkula iha Estrada públiku  tenke iha karta kondusaun no hirak ne’ebé ho idade tinan 16 ba leten mak foin bele trata Karta Kondusaun tuir nia rekijitu aproriadu sira.

Maria Antónia Vitor da Costa rekoñese, iha munisípiu balun mak motór Scooter sira iha ona, maibé iha ona planu atu halo  uluk atuasaun iha kapitál Díli, depois tuir mai munisípiu sira seluk.

Iha sorin seluk, Diretór Tránzitu Seguransa Rodoviária Nasionál (DTSRN) Superintendente Xefe Polísi, António Mauluta hatete, Polísia Tránzitu  hamutuk ho DNTT halo ona sosializasaun iha munisípiu, balun kestiona ba motór scooter ne’e, tanba utiliza husi labarik sira ne’ebé la iha karta kondusaun.

“Oras ne’e dau-dauk sirkular sai ona, ami sei determina tan loron atu oinsá ami halo operasaun,atu prevene labarik sira tau sira-nia aan iha risku bainhira konduz scooter iha Estrada públiku,” Superintendente Xefe Polísia António Mauluta hateten.

Nia alerta ba inan-aman hotu tenke iha responsabilidade ba oan sira, labele fasilita oan lori motór scooter hodi  ba halimar iha Estrada públiku.

Tuir Komunikadu konjunta, bazeia ba nú. 3, artigu 120° dekretu lei nú. 6/2003 kódigu estrada, bele hetan lisensa atu lori siklu motór  ka motór biabain, ema ho tinan 16 ba leten mak bele konduz no tuir regras tenke uza kapasete no tenke iha karta kondusaun ho kategoria A1.

Reportajen ekipa Rafa.tl