Udan Boot Obriga Jogu Karketu Díli F.C Vs Assalam F.C Adia

Udan ho intensidade boot iha Domingu (22/02/2026), obriga jogu meia-finál Karketu Díli FC vs Assalam FC tenke adia fali jogu ba Segunda, 23 Fevereiru ne'e, hale'u tuku 18:30 Otl. Imajen/Rafa.tl

DILI, RAFA.tl- Kondisaun klima halo udan ho intensidade boot no hamosu inundasaun ka bee nalihun iha Estádiu Munisipál Díli, liu-liu iha kampu laran, obriga jogu entre Karketu Díli F.C vs Assalam F.C tenke adia fali ba Segunda ohin (23/02/2026).

Notísia Relevante: Assalam F.C Prepara Estratéjia Espesiál Atu Halo Surpreza Ba Karketu Díli F.C

Jogu entre ekipa Karketu Díli F.C no Assalam F.C ne’ebé hala’o iha Estádiu Munisipál Díli, Domingu (22/02/2026), iha primeira parte jogu ekipa rua hahú kondisaun ka klima hatudu nakukun no udan komesa suviska.

Ekipa tékniku Taça da Liga haré katak kondisaun ne’e favorável tanba udan ho intensidade ki’ik.

Ekipa rua preparadu no iha ambisaun hakarak manán jogu ne’e, tanba ne’e ekipa rua halo kedas jogu ida atrativu no lansa kedas kontra atake ba malu. Jogu foin tama ba minutu 13 ekipa Assalam F.C lidera uluk jogu ne’e liu husi jogadór Agusto da Costa ne’ebé marka golu ba nia ekipa.

Ekipa Karketu Díli F.C mantein kalma hodi halo jogu ida ho intensidade aas atu hetan oportunidade ba hatama golu, no tama ba minutu 29 jogadór Karketu Díli F.C Daniel Gayo marka golu ba nia ekipa hodi halo impata ho skor 1-1.

Ekipa rua kontinua halo jogu, maibé kondisaun udan komesa tun ho intensidade boot hodi rezulta kampu laran nakonu ho bee, nune’e tama ba minutu 34 árbitru liu husi koordenasaun ho ekipa tékniku no komisaun organizadora Taça da Liga FFTL deside hapara jogu, tanba kondisaun la permite atu kontinua no deside adia mai Segunda ne’e iha oras tuku 18:30 Otl.

Prezidente komisaun Organizadora Taça da Liga FFTL, atuál Diretor Kompetisaun João Campos hatete, ho kondisaun klima ne’ebé hatudu udan ho intensidade boot halo komisaun deside tenke hapara jogu, tanba kondisaun bee iha kampu laran la permite atu kontinua jogu.

“Ita hotu hatene katak, jogu ida ohin ita postponed tiha, tanba iha forsa maior ne’ebé ita hatene katak udan maka’as, nune’e kampu ita labele utiliza  hodi kontinua, tanba ida ne’e, bainhira  halo tiha konsultasaun ho klubu rua, pasa tiha informasaun hotu, hein to’o 15 minutus primeiru, no 15 minutus segundu, udan nafatin kontinua ho nune’e ita labele kontinua jogu ohin kalan. Tuir artigu 22o regulamentu Taça da Liga, postponed ba jogu ida ne’e, tanba ita iha mós situasaun extraordináriu maka forsa maior, ne’ebé udan maka’as nune’e ita labele kontinua jogu,” João Campos hateten.

Iha jogu leg daruak faze meia-finál ne’e ekipa Karketu Díli FC mak sai hanesan uma na’in. Enkuantu jogu husi ekipa rua ne’e komisaun hapara iha minutu 34 tanba kondisaun klima ho udan boot.

Reportajen ekipa Rafa.tl