Úniku Golu Husi Angenuku Viegas Lori Emmanuel F.C Hakat Ba Finál Taça da Liga

Emmanuel FC selebra vitória hafoin halakon FC Porto Taibessi ho skor 1-0 iha meia-finál Taça da Liga, Sábadu (21/02/2026). Imajen/Rafa.tl

DILI, RAFA.tl – Jogu segunda faze (leg 2) entre Emmanuel F.C no F.C Porto Taibessi termina ho vitória ba Emmanuel F.C hafoin jogadór Angenuku Viegas marka úniku golu ne’ebé lori Emmanuel F.C ba finál Taça da Liga.

Notísia Relevante: Emmanuel F.C iha Ambisaun Hakarak Marka Golu Uluk ba Adversáriu Iha Jogu Faze Daruak Meiu-Finál Taça da Liga

Iha jogu segunda faze (leg 2) entre Emmanuel F.C no F.C Porto Taibessi ne’ebé hala’o iha Estádiu Munisipál Díli, Sábadu (21/02/2026), ekipa rua mai ho ambisaun hanesan hakarak hakat ba finál.

Iha jogu hahú jogadór sira husi ekipa rua hatudu jogu kontra atake ba malu, maibé F.C Porto Taibessi barak liu hein iha nia área no hafoin hetan bola oportunidade mak joga sa’e hodi halo kontra atake.

Emmanuel F.C halo presaun maka’as ba adversáriu F.C Porto Taibessi, maibé ekipa estimadu komunidade Taibessi ne’e sei nafatin halo balansu ba jogu ne’ebé Emmanuel F.C iha no halo kedas kontra atake lais, maibé sei falla.

Ekipa rua mantein ho ritmu no Emmanuel F.C iha liu oportunidade hodi marka golu no tama ba extra time primeira parte (45+7) jogadór Emmanuel F.C Angenuku Viegas marka golu ba nia ekipa hodi muda skor ba 1-0.

Kontinua ba segunda parte, F.C Porto Taibessi halo mudansa ba tátika, nune’e hahú halo tranzisaun ba liña klaran hodi buka oportunidade atu halo balansu ba jogu no fó oportunidade barak liu ba avansadu sira hodi marka golu, maibé sei falla.

Emmanuel F.C ne’ebé lidera tabela skor agresivu liután no kuaze domina bola iha liña klaran no halo ameasa barak ba adversáriu F.C Porto Taibessi.

Jogu entre ekipa rua kontinua ho intensidade aas, maibé la iha tan golu ruma akontese, nune’e Emmanuel F.C manán ho skor 1-0 no hakat ba finál Taça da Liga.

Treinadór Emmanuel F.C, Van Basten agradese ba adeptu, família no jogadór hotu ne’ebé kontribui ona, nune’e Emmanuel F.C bele hakat ba faze finál no sei prepara ekipa di’ak liután hodi joga iha finál.

“ Uluk nia na’in, agradese ba Aman Maromak, ba Emmanuel nia adeptu sira hotu, família no jogadór sira hotu ne’ebé fó suporta durante ne’e, no ohin loron, ami ba finál, rezultadu ohin ne’e rezultadu estraordináriu tebes, tanba jogu ohin ne’e atraitivu tebes, maibé Graças a  Deus, ami bele hetan golu iha primeira parte no konsege hakat ba finál,”  Van Basten hateten.

Treinadór F.C Porto Taibessi, Henki Noguera parabeniza ekipa Emmanuel F.C, no nia parte konsidera derota ne’ebé sira hetan tanba fallansu iha meiu kampu.

“Primeiru parabens ba Emmanuel, ohin, ami nia joga ne’e iha jogadór balu husi médiu fallansu oituan, ne’ebé iha primeira parte ita hotu haré, joga menus los, Emmanuel joga ho atake maka’as no minutu ikus sira hetan golu. Segunda parte, ami halo atake oituan, maibé la hetan golu, realidade mak hanesan ne’e, ita simu,” Henki Noguera hateten.

Tuir oráriu, jogu finál Taça da Liga FFTL sei realiza iha Sábadu, 28 fulan-Fevereiru ne’e iha Estádiu Munisipál Díli, oras tuku 19:00 OTL.

Reportertajen ekipa Rafa.tl