Komisaun Anti-Korrupsaun Lansa Sistema Keixa Online

CAC ho konvidade onra sira, lansa keixa online, Sesta (22/02/2026). Imajen/Rafa.tl

DILI, RAFA.tl– Komisaun Anti-Korrupsaun (CAC-sigla portugés), Sesta (20/02/2026),   lansa sistema keixa  online ba Públiku ho nia inderesu https://denunsiapublika.cac.tl, hodi fasilita sidadaun  sira hato’o keixa ruma ba CAC  liga ba kazu  korrupsaun.

Komisáriu CAC,  Rui Pereira do Santos,  iha nia diskursu  esplika katak,  Sistema Keixa Online ho naran Denúnsia Públika atu fasilita denunsiante sira labele hatama surat tahan mai iha edifísiu CAC, maibé bele informa de’it husi Sistema Keixa Online ne’e.

“Durante ne’e maluk sira ne’ebé hatama, balun mai husi mensajen, balun mai husi WhatsApp no karta, maibé ho keixa online ne’e, sira bele tau iha nia kronolojia di’ak, liga ho asuntu korrupsaun haruka mai CAC,” Rui Pereira dos Santos hatete.

Maneira atu rejista iha website, kuandu klik mosu formuláriu hakarak hato’o keixa mak uza de’it, bainhira mosu formuláriu, ense númeru  Billete Identidade, no naran ema ne’ebé hato’o denúnsia ne’e, inklui razaun husi denúnsia.

Komisariu CAC Rui Pereira dos Santos hatete, iha ezisténsia CAC hahú 2010 to’o mai 2026, CAC hahú dezenvolve aan ho servisu prinsipál ba iha investigasaun, área prevensaun, kooperasaun no seluk tan.

“Entretantu, investigasaun kriminál,  dezde CAC estabelese,  ha’u hanoin kazu lubuk boot ida ita finaliza nia investigasaun haruka hotu ona ba iha Mínistériu Públiku,”Komisáriu CAC Rui Pereira dos Santos hatete.

Nia  mos rekoñese katak,  sosiedade  sivíl dehan katak, CAC ne’e servisu kle’ur ona seidauk lori ema ba Prizaun. Maibé,  haré kazu korrupsaun ne’e to’o iha prizaun ne’e la monu husi Lalehan. Prosesu ne’e husi ne’e mak to’o iha ne’ebá  ba to’o Tribunál.

“Dezafiu sira sempre iha, mezmu iha susesu balun, maibé dezafiu sempre iha.  CAC ho rekursu limitadu no limitasaun finanseira, CAC  labele halo buat hot-hotu, maibé   tenta atu hala’o servisu tuir mandatu lei,” Rui Pereira afirma.

Tuir nia,  susesu  boot ba CAC mak iha tinan kotuk, CAC  partisipa  enkontru Estadu parte iha United Nations Convention Against Corruption (UNCAC)  iha Doha-Qatar, nune’e mos iha tinan kotuk, CAC partisipa iha  ASEAN Parte ne’ebé  ko’alia kona-bá Anti-Korrupasaun nian iha Malázia mos iha susesu.

CAC nia servisu iha parte inspesaun no monitorizasaun la’o di’ak. Tanba iha deskobrimentu lubuk ida ne’ebé mak  CAC hetan,  sei haruka relatóriu ba Ministériu relevante  no mos ba Parlamentu, inklui Primeiru-Ministru.

Iha  servisu deklarasaun rikusoin mos la’o hela, koima ne’ebé CAC  implementa tinan ida liu ba  US$400,000.00, maibé ida ne’e la’ós objetivu CAC  nian atu rekolla osan. Maibé ho koima ne’e para hanorin ema atu kumpre ba deklara nia  rikusoin.

Servisu iha área seluk, edukasaun no sensibilizasaun mos la’o iha munisípiu sira, iha eskola sira,  ba sentru formasaun sira, Institutu Nasionál ba Administrasaun Públika (INAP) no seluk tan.

Iha parte dezenvolvimentu institusionál,  Komisáriu CAC Rui Pereira dos Santos  hatete, dau-daun ne’e CAC iha ona Server liu-liu ba deklarasaun rikusoin nian oinsá bele prezerva dadus sira  ne’ebé liga ba deklarasaun rikusoin no investigsaun ba kazu.

Tuir lei,  Medida Prevensaun Kombate Korrupsaun (MPCC, sigla portugés) númeru 7/2020, 28 Augustu, fó biban ba instituisaun rua, hanesan CAC no Tribunál Rekursu ba deklarasaun rikusoin, tanba  ne’e server importante tanba atu prezerva no proteje dadus sira ne’e.

Nia dehan, kona-bá infraestrutura CAC, dau-daun CAC hetan apóiu husi Ministériu Planeamentu Investimentu Estratéjiku (MPIE)  apóia CAC konstrui uma ida iha edifísiu CAC nia kotuk hodi fasilita funsionáriu sira-nia servisu.

Iha fatin hanesan, Diretór Investigasaun Kriminál CAC,  José Verdial, rekoñese katak  hahú husi ezisténsia CAC iha 2010 to’o mai 2026 buat ne’ebé sai dezafiu mak CAC menus rekursu umanu no laiha edifísiu propriu.

Nia dehan, iha tinan 2025 CAC rejista kazu 102 no husi kazu sira ne’e pesoál CAC atu halo prosesu averiguasaun la to’o, tanba pesoál ne’ebé atu halo averiguasaun ne’e iha na’in-neen (6)  de’it iha Diresaun Investigsaun CAC nian.

José Verdial  hatutan, ba oin esforsu atu tau konsiderasaun ba asuntu sira ne’e, nune’e fó atendimentu públiku ba komunidade ho di’ak liu tán.

 Reportajen Ekipa Rafa.tl