PNTL Asegura Xinés Na’in-18 iha Fomento Tanba Deskonfia Komete Jogu Ilísitu

Polísia asegura Xinés na'in-18 tanba deskonfia komete jogu ilísitu iha Fomento, Comoro, Díli, Sesta kalan (20/02/2026). Imajen/Rafa.tl

DILI, RAFA.tl –  Polísia Nasionál Timor-Leste (PNTL), Sesta (20/02/2026), hale’u tuku 18:00 Otl, halo buska no apreensaun ba iha rezidénsia ida iha área Fomento, Díli, hodi asegura sidadaun estranjeiru ho nasionalidade Xina na’in-18, tanba deskonfia komete jogu ilísitu ka online scamming.

Notísia Relevante: Tribunál Aplika Medida Koasaun Aprezentasaun Periódika no Garantia US$10,000.00 husi Arguidu Jogu Online

Iha buska ne’e autoridade Polísia Timoroan sira identifika no halo apreensaun ba ekipamentu sira hanesan, brangkas tau osan ida  (Safety Box) , modem wireless  ida (1), Komputadór PC hamutuk 12, meza desktop rua (2), meza ki’ik tolu (3), kama andár 10, kama mola (spring bed) 20 ne’ebé tau iha kuartu neen (6) nia laran.

‎Sidadaun Xina na’in-18  hamutuk ho sasán hirak ne’ebé PNTL asegura,  transporta hotu kedas ba iha Komandu Jerál PNTL iha Diresaun Servisu Investigasaun Kriminál Nasionál (DIKN) hodi submete ba identifikasaun.

Tuir informasaun Polísia nian katak, sidadaun Xina na’in-18 ne’e, foin tama mai Timor-Leste iha loron haat (4) tu-tuir malu, hahú husi loron 09 to’o loron 12 fulan-Fevereiru ne’e.

Xinés na’in-18 ne’e   aluga komunidade ida nia uma iha área Fomento,  Suku Comoro, Postu Administrativu Dom Aleixo, Munisípiu Díli, hodi halo instalasaun ba atividade ne’ebé deskonfia iha ligasaun ho online scamming.

Iha prosesu buska no apreensaun ne’e, uma na’in ne’ebé hanesan sidadaun  Timoroan  lakohi atu koopera ho ekipa konjunta PNTL,   nune’e mosu diskusaun naruk iha lokál atuasaun. Maibé,  to’o ikus, uma-na’in koopera no autoriza ekipa konjunta  hodi halo fiskalizasaun no identifikasaun ba ekipamentu hotu ne’ebé deskonfia atu utiliza ba atividade jogu online scamming.

Reportajen ekipa Rafa.tl