PM Xanana Deklara Respeita Desizaun Myanmar Ba Espulsaun Hasoru Enkaregadu Negósiu Timor-Leste

PM Xanana Gusmão halo enkontru semanál ho Xefe Estadu, José Ramos-Horta iha Palásiu Prezidensiál, Kinta (19/02/2026). Imajen/Rafa.tl

DILI, RAFA.tl – Primeiru-Ministru (PM), Kay Rala Xanana Gusmão, deklara, Governu Timor-Leste respeita desizaun Myanmar nian hodi halo espulsaun hasoru Enkaregadu Negósiu Timor-Leste nian sai husi Myanmar.

Notísia Relevante: Myanmar Espulsa Reprezentante Timor-Leste Relasiona ho Alegasaun Kazu Krime Hasoru Umanidade

Primeiru-Ministru (PM), Kay Rala Xanana Gusmão, ba jornalista sira iha Palásiu Prezidensiál, Kinta (19/02/2026) hatete, Timor-Leste respeita desizaun Myanmar nian ba espulsaun Enkaregadu Negósiu Timor-Leste nian no Timor-Leste laiha kbiit atu halo julgamentu ba kazu sira akontese iha Myanmar no país seluk.

‘’Sira hasai desizaun, ita respeita, ita mos tenke hatene katak buat ne’e justisa nian, mais ita sente katak ita la iha kbiit ba julga buat sira ne’ebé akontese iha liur,” Xanana Gusmão hateten.

Desizaun Myanmar nian hodi halo espulsaun hasoru enkaregadu Negósiu Timor-Leste tanba iha fulan hirak ba kotuk, Myanmar Accountability Project (MAP) hamutuk ho reprezentante sira husi Komunidade Kristã Myanmar nian (Estadu Chin), hato’o keixa ofisiál ba Ministériu Públiku Timor-Leste kona-bá krime kontra umanidade ne’ebe komete husi junta militár Myanmar.

Organizasaun “The Chin Human Rights Organization” (CHRO), informa mós katak, keixa kriminál ne’ebé grupu ne’e hato’o ba Prokuradoria Timor-Leste, inklui evidénsia kona-bá violasaun koletiva hasoru feto isin-rua ida, Masakre ba ema na’in-10, inklui jornalista ida no labarik mane ida ho tinan 13, oho Pastor Kristaun ida no diákonu na’in- tolu.

Ho situasaun ne’e Primeiru-Ministru Kay Rala Xanana Gusmão hatete katak, Timor-Leste la iha kompeténsia atu halo julgamentu ba kazu refere, no nia konsidera katak, ita ne’e la fó impaktu ba nasaun ida ne’e, tanba bazeia ba klarifikasaun husi Estadu Timor-Leste hodi nune’e sira mos bele komprende.

“Espera katak, kazu ne’ebé hatama ona iha Prokuradoria Jerál ne’e arkiva tiha de’it. Ha’u atu dehan de’it, ita laiha kompeténsia atu julga,” Xanana Gusmão subliña.

Xefe Governu ne’e haktuir, nia parte mós lori dokumentu krime funu nian, ne’ebé komisaun de rekonsiliasaun no verdade no justisa hasai hamutuk ho nasaun Indonésia, ne’ebé halo akordu entre Estadu rua, kona-bá krime hotu ne’ebé Indonésia komete iha Timor.

Dokumentu ne’e nia rasik ba aprezenta iha Sekretáriu Jerál Oranizasaun Nasoins Unidas (ONU) ne’ebé iha tempu ne’ebá lidera husi Kofi Annan, hodi aprezenta kona-bá kazu saida de’it maka akontese iha Timor-Leste durante 24 nia laran Indonésia invade Timor-Leste

Reportajen ekipa Rafa.tl