Hahú Semana Oin, PM Xanana Vizita Munisípiu Sira no Diskute Estabelesimentu Governu Lokál

PM Xanana Gusmão sei halo vizita ba munisípiu sira iha tempu badak nia laran. Imajen/Rafa.tl

DILI, RAFA.tl – Hahú semana oin, husi loron 24 fulan-Fevereiru to’o loron 18 fulan-Marsu, tinan ne’e, Primeiru-Ministru (PM) Kay Rala Xanana Gusmão, halo vizita ba kada munisípiu hodi halo diskusaun kle’an ba ezisténsia Governasaun lokál, ne’ebé sei akontese iha 2027 hodi hili ema ne’ebé servisu di’ak, atu nune’e povu sira sente Governu lokál ne’e sira nian rasik.

Notísia Relevante: Governu Aprezenta Relatóriu Preliminar Avaliasaun Kondisaun Mínima Munisípiu sira Ba Desentralizasaun no Podér Lokál

Primeiru-Ministru Kay Rala Xanana Gusmão hato’o nia planu  no ajenda viajen lokál ne’e ba jornalista sira hafoin enkontru semanál ho Prezidente Repúblika José Ramos-Horta, iha Palásiu Prezidensiál, Díli, Kinta (19/02/2026).

“Ha’u informa ona ba Prezidente katak hahú  loron  24 Fevereiru ne’e to’o loron18 Marsu, tinan ne’e, sei diskute didi’ak hodi haré ona ka hili ema sira ne’ebé atu tau iha governu lokál, atu  povu sente katak Governu lokál ne’e sira-nia Governu rasik,” PM  Xanana Gusmão hateten.

Xefe Governu haktuir, husi Ministériu Administrasaun Estatál (MAE) halo tiha ona avaliasaun kona-bá servisu sira ne’ebé hala’o iha kada munisípiu, hatene ona iha ne’ebé mak iha fallansu no kapasidade la to’o karik.

Nia hatutan, avaliasaun halo nafatin hodi bele deside, avaliasaun ne’e halo iha área finansas, administrasaun, planeamentu, ezekusaun iha PNDS, buat sira  ne’e hotu atu deside munisípiu ne’ebé mak bele tama iha eleisaun iha tinan 2027.

“Governu lokál la’o, hodi povu rasik mós partisipa, haré, hatene no komprende ezekusaun orsamentu ne’e la’o oinsá, planeamentu ne’e halo oinsá, tanba lae mai hotu sentral, ita haré  husi Tutuala  to’o iha Oé-Cusse, tasi feto to’o tasi mane, hotu-hotu dehan ami nian, tanba hotu-hotu sente katak ami nian ne’e mak importante, ami nian ne’e mak tenke haré kedas ona no urjente liu, mas kuandu iha ona munisípiu ne’e nia laran, suku, aldeia, postu administrativu, katuas sira hamutuk hodi dehan ida ne’ebé mak urjente, entaun tinan ida ne’e ita halo ida ne’e, tinan ida seluk, ita halo ida seluk, Eskola, Saúde, Estrada, Eletresidade, Agrikultura, Turizmu buat sira ne’e hotu,” Xanana Gusmão esplika.

Primeiru-Ministru Kay Rala Xanana Gusmão subliña, eleisaun ne’e ba asembleia Munisipál, ba deputadu Munisipais hodi bele kontrola Governu nia atividade, nune’e osan povu nian gasta ho di’ak no loos.

Reportajen ekipa Rafa.tl