Ramos-Horta Haré Rasik Pasiente Dengue iha HNGV

Prezidente Repúblika, José Ramos-Horta, viita pasiente moras dengue sira iha HNGV, Kuarta (18/02/2026). Imajen/Rafa.tl

DILI, RAFA.tl– Prezidente Repúblika (PR), José Ramos-Horta, halo vizita surpreza ida ba Ospitál Nasionál Guido Valadares (HNGV) hodi haré rasik pasiente moras dengue ne’ebé halo tratamentu ka baixa iha ospitál nasionál ne’e.

Notísia Relevante: Pasiente Dengue 166 Kontinua Baixa iha Ospitál Sira iha Timor-Leste

Iha vizita ne’e, Xefe Estadu konversa ho médiku sira no pasiente ho família pasiente sira, kona-bá situasaun atuál iha HNGV, liuliu relasiona ho atendimentu sira ba pasiente dengue ne’ebé maioria labarik feto no mane.

Iha Domingu liubá, Prezidente Repúblika, José Ramos-Horta mós halo vizita ba HNGV hodi fahe rasik bee ho jus guava ba pasiente dengue sira tanba Xefe Estadu entende katak atu hakman pasiente dengue sira ne’e tenke hemu bee barak no hemu mós jus guava.

“Ha’u mai iha Domingu liubá, ha’u mak fahe rasik bee  ba  pasiente dengue sira, maibé ha’u haré barak los, ne’e duni ha’u rasik telefone industria agua balun iha Dili laran no kontaktu ba na’in fabrika bee Gota Sr. Nilton Gusmão atu bele oferese bee mai pasiente sira iha HNGV no fahe mós jus guava atu ajuda paisente sira rekupera lalais sira-nia saúde ho hemu bee barak no hemu jus guava,” José Ramos-Horta hateten ba jornalista sira bainhira vizita ba HNGV, Kuarta (18/02/2026).

Xefe Estadu  apresia ho médiku sira nia servisu ne’ebé halo ona atendimentu di’ak ba pasiente sira ne’ebé sofre dengue iha HNGV .

“Doutor sira servisu todan ho enfermeiru sira. Dalabarak sira hetan krítika oin-oin, maibé kondisaun mak ne’e, seidauk di’ak, doutor ho enfermeiru sira servisu,  agora uma Ospitál ida fali agora atu prontu ona,” Xefe Estadu hateten.

Ramos-Horta husu pesoál saúde sira servisu maka’as nafatin hodi halo atendimentu di’ak ba pasiente sira, nune’e bele rekupera lalais sira nia moras, fila ba uma hamutuk ho sira nia família.

Xefe Estadu husu mós ba inan-aman ho família sira, nafatin hamós foer iha uma-hun, labele husik foer nakonu no bee nalihun ne’ebé bele sai knuuk ba susuk aedes aegypti ne’ebé lori moras dengue.

Iha fatin hanesan, Diretor Ezekutivu  HNGV, Nuno Vital relata, númeru pasiente ne’ebé moras dengue dau-daun ne’e halo hela tratamentu iha HNGV ho Karantina Tasi-Tolu hamutuk 164, no na’in-10 lakon vida.

“Númeru pasiente ne’ebé agora iha HNGV ho balun iha Tasi-Tolu  hamutuk na’in-164. Husi numeru ne’e, iha fulan-Janeiru to’o fulan-Fevereiru ne’e, na’in-10 lakon vida,” Nuno Vital hateten.

Pasiente sira moras dengue ne’ebé daudaun ne’e baixa iha Karantina Tasi-Tolu na’in-45, no  nain-119 halao hela tratamentu iha HNGV.

Reportajen ekipa Rafa.tl