Emmanuel F.C ho F.C Porto Taibessi Fahe Pontu Hanesan iha Jogu Dahuluk Faze Meia-Finál Taça da Liga

Emmanuel F.C ho F.C Porto Taibessi fahe pontu hanesan ho skor 1-1 iha jogu dahuluk (Leg 1) faze meia-finál Taça da Liga iha Estádiu Munisipál Díli, Sábadu (14/02/2026). Imajen/FFTL

DILI, RAFA.tl – Ekipa Emmanuel F.C ho F.C Porto Taibessi obrigadu tenke fahe pontu hanesan ho skor 1-1 iha jogu dahuluk (Leg 1) faze meia-finál Taça da Liga.

Notísia Relevante: Emmanuel F.C Sei Hatudu Agresividade iha Jogu Kontra F.C Porto Taibessi

Jogu dahuluk (Leg 1), faze meia-finál Taça da Liga ne’ebé halao iha Estádiu Munisipál Díli, Sábadu (14/02/2026), iha primeira parte jogu hahú, ekipa Emmanuel F.C hatudu jogu ida domina liu iha liña klaran hodi halo atake ba F.C Porto Taibessi.

Maske nune’e, ekipa estimadu komunidade Taibessi ne’e mantein joga ho kalma hodi asegura guarda rede husi bola ameasa sira, nune’e buka oportunidade hodi halo kontra atake.

Ekipa Emmanuel F.C maske domina jogu iha liña klaran, maibé falla iha liña oin, tanba avansadu sira la maksimiza oportunidade ne’ebé iha hodi halo jogu no hatama golu.

Ekipa F.C Porto Taibessi ne’ebé halo jogu ho bola as fó mós ameasa ba adversáriu Emmanuel F.C, maibé bola hirak ne’e seidauk monu ba alvu, nune’e ekipa rua termina primeira parte ho skor 0-0.

Hakat ba segunda parte, ekipa Emmanuel F.C hasa’e kedas intensidade jogu hodi fó presaun ba adversáriu F.C Porto Taibessi, maibé adversáriu mantein kalma no hamate bola iha liña kotuk.

Emmanuel F.C hahú halo uluk subtituisaun ba jogadór iha liña klaran no avansadu, hodi halo jogu ida agresivu liután, maske nune’e, F.C Porto Taibessi nia jogadór sira mantein joga ho disipliña hodi asegura guarda rede.

Iha minutu 53, jogadór Emmanuel F.C Angenuku Viegas marka golu ida hodi muda skor ba 1-0.  Ho golu ne’e, F.C Porto Taibessi esforsu hodi buka meius atu halo empata.

F.C Porto Taibessi mós hahú halo mudansa ba jogadór iha liña klaran no avansadu hodi buka oportunidade atu hatama golu, no subtituisaun ne’e lori rezultadu di’ak ba F.C Porto Taibessi tanba tama ba minutu 89, jogadór Jardiel Piadade marka golu ida ba nia ekipa hodi muda skor ba 1-1 too jogu termina ekipa rua mantein ho skor hanesan 1-1.

Asistente Treinadór Emmanuel FC, Van Basten hateten iha jogu ne’e nia ekipa hetan oportunidade barak, maibé tanba falla iha ezekusaun, nune’e ekipa rua obrigadu tenke fahe pontu hanesan ho skor 1-1.

“Hanesan antes ne’e ha’u hatete, ami mai ho jogu ida ataka, maibé Porto Taibesse mai ho ekipa ida ne’ebé ho vontade maka’ás, ohin, ami sente ladun kontente, tanba ami ataka oportunidade dala barak, maibe ami labele hetan golu, entaun prezudika jogu ne’e sai impata,” Van Basten hateten.

Iha fatin hanesan, Treinadór F.C Porto Taibessi, Henki Noguera parabeniza nia ekipa ne’ebé ho esforsu tomak halo impata iha jogu ne’e tanba sira-nia parte konsidera Emmanuel F.C  hanesan klubu ne’ebe zigante no jogu tuir mai nia fiar katak sei halakon Emmanuel F.C iha segunda faze (leg 2).

“Ba parte ami nian, hau haré primeiru parte ami joga di’ak tebes, Emanuel mós joga di’ak, mézmu Emanuel FC nu’udár klubu ne’ebe mak boot iha liga Timor, maibe ami la hakfodak no la tauk,” Henki Noguera afirma.

Tuir oráriu jogu ba faze daruak (leg 2),  entre Emmanuel F.C no F.C Porto Taibessi sei hala’o iha Sábadu, 21 fulan-Fevereiru ne’e iha Estádiu Munisipál Díli, iha oras tuku 18:00 OTL, hodi hada’u malu billete ba finál Taça da Liga FFTL.

Reportajen ekipa Rafa.tl