POLTRANS Sei Koordena ho DNTT Atu Monta Hikas Sinais Estasionamentu iha Área Palásiu Governu

Polísia Tránzitu no Seguransa Rodoviária Nasionál (POLTRANS) halo observasaun ba motór sira ne'ebé utiliza trotoár sai fali fati nestasionamentu iha área Palásiu Governu ne'ebé prezudika ema la'o ain sira. Imajen/Rafa.tl

DILI, RAFA.tl– Polísia Tránzitu no Seguransa Rodoviária Nasionál (POLTRANS) sei koordena ho Diresaun Nasionál Transporte no Terrestre (DNTT) atu monta hikas sinais tránzitu iha área Palásiu Governu, hodi halo ordenamentu tránzitu no aumenta seguransa ba ema la’o-ain no mtorista sira.

Xefe Departamentu Kordenasaun Jestaun Risku ba Formasaun Edukasaun Sívika, Superintendente Asistente Polísia Domingos Sarmento Gama, husu ba motorista hotu atu respeita regra tránzitu no labele para iha trotoár ne’ebé rezerva ba la’o-ain.

Nia hatutan, sira-nia parte halo observasaun direta atu haré estasionamentu iha área Palásiu Governu. Tuir  lei kódigu estrada, iha artigu 49o-50o, ne’ebé ko’alia kona-bá regra estasionamentu. Motorista sira iha konsiénsia tenke haré oinsá maka estasionamentu ida-ne’e labele afeta ba movimentu sidadaun sira nian.

“Ita hakarak rekomenda fila-fali ba parte Diresaun Nasionál Transporte no Terrestre, karik bele, tempu badak ita koloka fila-fali sinais ida proibidu ba estasionamentu iha área Palásiu Governu nian, ho razaun tanba areadores Palásiu Governu nian ho estasionamentu para rungu-ranga, hanesan ne’e mak ita nia vizitante VIP sira kuandu la’o tama sai haré ladún furak,” Superintendente Asistente Polísia Domingos Sarmento Gama, informa ba jornalista sira iha areadores Palásiu Governu, Kinta (12/02/2026).

Superintendente Asistente  Polísia ne’e afirma kona-bá estasionamentu iha área Palásiu Governu,  Polísia Tránzitu la foti medida atu halo apreensaun ba transporte sira, maibé sei fó hanoin de’it ba motorista sira.

“Ita mai so fó hatene de’it, tanba sinais ita hasai tiha ona, ida ne’e mak ita preokupa oinsá tempu tuir mai tenke koloka fali estasionamentu, liu-liu ba areadores Palásiu Governu,” Domingos Sarmento Gama hateten.

Xefe Departamentu Kordenasaun Jestaun Risku ba Formasaun Edukasaun Sívika ne’e rekoñese membru Polísia Tránzitu ne’ebé hala’o knaar iha unidade Tránzitu Nasionál mínimu tebes, iha de’it na’in-40 resin, no balun koloka tiha ba akompaña Xefe Estadu, Xefe Governu, no mós ba iha bainaka sira difikulta tebes atu kontrola ba transporte sira.

Reportajen ekipa Rafa.tl