PR Horta Nomeia Pedro Klamar Fuik Nu’udar Enviadu Espesiál Ba Misaun Bons Ofísiu CPLP iha Guiné-Bissau

Ministru Defeza, Kontra-Almirante Donaciano da Costa Gomes “Pedro Klamar Fuik”. Imajen/Dok.Idn TL

DILI, RAFA.tl- Prezidente Repúblika, José Ramos-Horta, liu hosi Dekretu Prezidensiál nú.º 13/2026, iha  loron 9 fulan-Fevereiru, nomeia Ministru Defeza, Kontra-Almirante Donaciano da Costa Gomes “Pedro Klamar Fuik”, nu’udar Enviadu Espesiál Prezidente Repúblika nian ba Misaun Bons Ofísiu Komunidade País sira Lian Portugés (CPLP-sigla portugés) iha Guiné-Bisau, ne’ebé sei hala’o husi loron 17 to’o loron 21 fulan-Fevereiru, 2026.

Iha komunikadu ofisiál ne’ebé Rafa.tl asesa husi Portál Governu Timor-Leste, Kinta (12/02/2026) hatete, desizaun ne’e halo hafoin Konferénsia Estraordinária I hosi Xefe Estadu no Governu CPLP nian, ne’ebé hala’o iha loron 16 fulan-Dezembru tinan 2025.

Repúblika Demokrátiku Timor-Leste asumi Prezidénsia Pro-Tempore (ho tempu determinadu) organizasaun Komunidade País sira Lian Portugés to’o tinan 2027, hafoin Guiné-Bisau hetan suspensaun hosi atividades hotu-hotu iha CPLP.

“Hanesan hatúr ona iha Dekretu Prezidensiál, Misaun ne’e halo viajen ba Guiné-Bisau ho objetivu prinsipál atu halo mediasaun la’ós de’it ba libertasaun imediata no inkondisionál ba ema hotu ne’ebé detidu hafoin krize iha loron 26 fulan-Novembru, maibé mós atu hasai kedas orden urjente konstitusionál hanesan kondisaun,”  Rafa.tl sita komunikadu.

Tuir alínea  b) hosi artigu 87o Konstituisaun Repúblika Demokrátika Timor-Leste, Prezidente Repúblika dezigna Ministru Defeza nu’udar nia Enviadu Espesiál hodi reprezenta Estadu Timoroan  iha misaun altu nível CPLP ne’e.

Delegasaun ne’e inklui reprezentante hosi Angola, Saun Tomé no Prínsipe no planeia atu hasoru malu ho Ministru Negósiu Estranjeiru no Koperasaun Guiné-Bissau nian, Altu-Komandu militár, reprezentante hosi sosiedade sivíl no entidade sira seluk.

Misaun ne’e hanesan parte hosi responsabilidade ne’ebé Timor-Leste assume hodi ezerse Prezidénsia Pro-Tempore CPLP nian ba períodu 2026-2027.

Reportajen ekipa Rafa.tl