Konstrusaun Edifísiu Foun Pediatría no Unidade Kuidadu Intensivu Atinji 70%

Konstrusaun edifísiu foun pediatría no unidade kuidadu intensivu HNGV atinje 70%. Imajen/Rafa.tl

DILI, RAFA.tl- Ministra Saúde (MS), Élia A.A. dos Reis Amaral, Kuarta (11/02/2026), informa, konstrusaun edifísiu foun pediatría no unidade kuidadu intensivu iha Ospitál Nasionál Guido Valadares (HNGV, sigla portugés), atinji ona 70%, nune’e iha  tempu badak sei instala ekipamentu médiku  no non médika ba edifísiu foun ne’e.

“Ita hein no akompaña mós instalasaun oxijéniu, ho mós ba iha instalasaun ekipamentu médika no non ekipamentu  médika, ne’ebé mak ita espera katak iha tempu badak sei to’o mai, ita sei halo instalasaun,” Ministra Saúde Élia  A.A. dos Reis Amaral informa ba jornalista sira iha Palásiu Governu, Díli.

Ministra Élia dos Reis Amaral subliña liután katak, konstrusaun ba edifísiu foun pediatría HNGV besik ramata no prosesu konstrusaun kontinua la’o ba oin.

“Iha semana rua liubá, fiskalizasaun Ministériu Saúde nian katak iha 70% no agora bele liu ona, tanba konstrusaun kontinua la’o kada loron,”  Ministra Élia Amaral hateten.

Edifísiu foun pediatría ho andár lima ne’e  konstrui husi empreza China Civil Engineering Construction Corporation (CCECC), ne’ebé kontrata husi VIII Governu Konstitusionál, liu husi Ministériu Saúde   ho kustu projetu millaun US$9.3 ho intensaun atu kria kondisaun ida di’ak hodi atende pasiente sira pediatría nian.

Reportajen Ekipa Rafa.tl