Governu Timor-Leste Kria OATL no Aprova Nia Estatutu

Reuniaun Konsellu Ministru iha Palásiu Governu, Kuarta (11/02/2026). Imajen/Gov.tl

DILI, RAFA.tl– Konsellu Ministru liu husi sorumutu iha Palásiu Governu, Díli, Kuarta (11/02/2026), aprova projetu Proposta Lei, ne’ebé aprezenta husi Ministru Justisa, Sérgio de Jesus Fernandes da Costa Hornai, hodi kria Orden Advogadu Timor-Leste (OATL- akrónimu iha lian portugés)  no aprova ninia estatutu.

Iha komunikadu ofisiál ne’ebé Rafa.tl asesa husi Portál Governu Timor-Leste hatete, diploma ne’e ho objetivu atu kria Orden (Asosiasaun) Advogadu Timor-Leste nu’udar asosiasaun profisionál públika, ne’ebé responsável atu regula asesu no prátika advokasia, reprezenta profisaun ne’e no define regra sira ne’ebé aplika ba organizasaun, funsionamentu no disiplina iha advogadu no advogadu estajiáriu sira.

Inisiativa ne’e estabelese enkuadramentu jurídiku (legál) ba OATL, define ninia atribuisaun, órgaun, kompeténsia no mekanizmu sira funsionamentu nian, nune’e mós prinsípiu sira ne’ebé aplika hodi hala’o profisaun, hodi kontribui ba reforsu organizasaun advokasia no konsolidasaun sistema justisa nasionál.

Diploma ne’e mós aprova Rejime Jurídiku Sosiedade Advogadu sira nian, ne’ebé define kondisaun konstituisaun, organizasaun no funsionamentu sosiedade ne’e nian, ho objetivu atu enkuadra prátika  koletiva advokasia, promove transparénsia boot liu no garante kumprimentu ba regra profisionál no deontolójika nian.

Reportajen ekipa Rafa.tl