Governu TL Kongratula Prezidente Eleitu António José Seguro iha Eleisaun Prezidensiál Portugal

Prezidente Eleitu Portugal, António José Seguro. Imajen/Pedro Nunes-Reuters

DILI, RAFA.tl-Governu Repúblika Demokrátika Timor-Leste (RDTL) kongratula prezidente eleitu António José Seguro ba nia vitória iha eleisaun prezidensiál Portugal.

Iha komunikadu ofisiál ne’ebé Rafa.tl asesa husi Portál Governu Timor-Leste, Tersa (10/02/2026),  mensiona Governu Timor-Leste felisita prezidente eleitu António José Seguro, nu’udar Prezidente Repúblika Portugeza no  mellores votus iha mandatu ida nakonu ho ézitus ba servisu Nasaun.

Rezultadu ne’ebé di’ak tebes husi prosesu eleitorál ne’e, reflete konfiansa boot iha nia lideransa husi parte povu portugés, ne’ebé sai hodi ezerse sira-nia direitu, maski dezafiu oi-oin iha loron sira dahikus.

“Timor-Leste ho Portugal partilla amizade istórika ida ne’ebé hatúr-metin iha língua, iha patrimóniu kulturál, no iha lasu ne’ebé dura kleur ona entre ita-nia povu sira. Relasaun ida ne’ebé di’ak tebe-tebes durante ita-nia istória naruk, no hametin liután ho kooperasaun, kontinua hanesan fonte ka hun husi forsa boot ida iha ita-nia parseira ohin-loron,” Rafa.tl sita komunikadu

Iha momentu tranzisaun ho inserteza iha nível globál ne’e, Timor-Leste rekoñese papél importante Portugal nian iha esforsu mundu tomak nian ba defeza multilateralizmu, igualdade no valores umanitáriu.

Timor-Leste hakarak servisu hamutuk ho Prezidente eleitu Seguro hodi hakle’an relasaun bilaterál no promove kooperasaun internasionál, solidariedade ho dignidade umana. “Ne’e inklui  ami-nia kompromisu ne’ebé partilla ho Komunidade Paízes Língua Portugeza, ne’ebé sei sai nafatin  hanesan  pilár sentrál ka ai-riin boot ida iha kooperasaun entre nasaun luzófona sira.”

Governu Timor-Leste hakarak mós servisu hamutuk liu husi kooperasaun metin ho Portugal durante mandatu Prezidente eleitu Seguro, iha espíritu amizade, respeitu no objetivu ne’ebé hanesan.

Reportajen ekipa Rafa.tl