play_arrow

keyboard_arrow_right

Listeners:

Top listeners:

skip_previous skip_next
00:00 00:00
chevron_left
volume_up
Go to album
  • play_arrow

    Ouvir RAFA Ritmo, Voz e Coração de Timor

Noticias

Governu Reforsa Koordenasaun Interministeriál iha Siberseguransa

todayFebruary 10, 2026 33 4

Background
share close

Enkontru Grupu Traballu Interministeriál Siberseguransa ne'ebé lidera husi Ministru Prezidénsia Konsellu Ministrus, Agio Pereira. Imajen/Média MPCM

DILI, RAFA.tl– Grupu Traballu Interministeriál Siberseguransa (GICS, sigla portugés) hala’o enkontru tékniku iha ámbitu implementasaun Despaxu nú.021/PM/X/2025, ne’ebé kria mekanizmu koordenasaun interministeriál.

Iha komunikadu ofisiál ne’ebé Rafa.tl asesa husi Portál Governu Timor-Leste, Tersa (10/02/2026), relata katak enkontru GICS ne’ebé lidera husi Ministru Prezidénsia Konsellu Ministru, Agio Pereira, ho objetivu prinsipál, halo análize téknika no rekolla kontribuisaun husi espesialista sira kona-bá pakote siberseguransa nian, ne’ebé foka ba enkuadramentu legál, institusionál, no operasionál ne’ebé nesesáriu ba protesaun sistema krítiku nasionál, liu-liu kabu submariñu fibra ótika (Timor-Leste South Submarine Cable – TLSSC), infraestrutura estratéjika ida ba soberánia dijitál no seguransa nasionál.

GICS ne’e kompostu husi membru Governu no líder sira hosi instituisaun prinsipál Estadu nian, inklui ho Ministru Prezidénsia Konsellu Ministru, hanesan líder polítiku no prezidente grupu Ministru Transporte no Komunikasaun,  Miguel Marques Gonçalves Manitelu no Ministru Justisa, Sérgio da Costa Hornai.

Grupu ne’e inklui mós partisipasaun hosi Diretór-Jerál Servisu Nasionál Intelijénsia Estratéjiku (SNIE), nu’udar koordenadór tékniku, no Diretór TIC Timor, nu’udar vise-koordenadór tékniku adjuntu, entre entidade nasionál sira seluk ho kompeténsia iha área seguransa, justisa, komunikasaun no supervizaun finanseira.

Sorumutu ne’e marka inísiu ho sesaun téknika no institusionál balun, ne’ebé hala’o husi loron 9 to’o loron 12 fulan-Fevereiru, inklui enkontru ho Ministériu Transporte no Komunikasaun, Servisu Nasionál Intelijénsia Estratéjiku, Unidade Informasaun Finanseira  Banku Sentrál Timor-Leste (UIF-BCTL), no entidade sira setór justisa nian, ho objetivu atu hametin preparasaun nasionál iha área seguransa dijitál nian.

Reportajen ekipa Rafa.tl

Written by: RafaFM

Rate it

Similar posts

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!