Laiha Reajente, Kandidatu Ajente Polísia Na’in-400 Seidauk Bele Halo Teste Médiku

Sekretariadu Rekrutamentu Ajente foun PNTL 2025 halo konferénsia imprensa iha Akademia Polísia, Comoro, Díli, Segunda (09/02/2026). Imajen/Rafa.tl

 DILI, RAFA.tl– Kandidatu Ajente Polísia Nasionál Timor-Leste (PNTL) na’in-400 ne’ebé tuir oráriu atu tuir teste médiku, Tersa (10/02/2026), adia fila-fali ba loron seluk tanba reajente ne’ebé atu utiliza ba teste ne’e to’o agora seidauk iha.

Notísia Relevante: Rekrutamentu Ajente PNTL Foun Manatuto Mós Deskonfia iha Favoritizmu

Porta-voz Sekretariadu Rekrutamentu Ajente foun PNTL 2025, Superintendente Polísia António da Luz, liu husi konferénsia imprensa iha Sentru Formasaun Akademia Polísia, Segunda (09/02/2026),   hateten komisaun deside adia  halo teste médiku ba ajente foun na’in-400 tanba reajente atu atuliza ba teste mèdiku nian seidauk iha.

“Hanesan semana kotuk fó sai ona ba públiku katak, iha loron 10 fulan-Fevereiru ne’e, ami atu hala’o teste médiku ba kandidatu sira ne’ebé mak aptu (passa) na’in-400 ne’e, maibé parte Departamentu Saúde PNTL halo koordenasaun ho laboratóriu nasionál Ospitál Nasionál Guido Valadares (HNGV) konfirma katak, ekipamentu ne’ebé atu halo teste hanesan reajente to’o agora seidauk iha,” Superintendente  Polísia António da Luz informa.

Iha fatin hanesan, Xefe Departamentu Saúde PNTL, Superintendente Assistente Polísia Analita do Rego, klarifika ba publiku, liu-liu ba ajente foun na’in-400 ne’ebé atu tuir teste médiku katak, seidauk bele realiza tuir tempu ne’ebé determina, tanba fasilidade no ekipamentu ba teste médiku seidauk kompletu.

“Atu klarifika de’it ita nia oráriu atu ba halo prova médika, tuir lolós iha loron 10 to’o loron 20 fulan-Fevereiru ne’e, maibé konfirmasaun ho Departamentu Saúde PNTTL ho  laboratoriu nasionál HNGV katak, fasilidade  ne’ebé mak atu halo teste ne’e seidauk to’o iha Timor-Leste, entaun ita halo mudansa oráriu. Husi parte Instituisaun PNTL ami hein de’it, kuandu reajente to’o iha ne’e ona, ami bele fó hatene data fiksu ba públiku,” Superintendente Assistente Polísia Analita do Rego hateten.

Superintendente Assistente Polísia ne’e hatutan, fasilidade sira ba teste médiku ne’e hein rezultadu husi laboratóriu nasionál HNGV no  bainhira reajente sira to’o ona iha  Timor sei fó sai fali ba públiku.

Porta-voz Sekretariadu Rekrutamentu Ajente Foun PNTL 2025, Superintendente António da Luz, subliña mós katak, kona-bá lista ajente PNTL foun na’in-400 ne’ebé Sekretariadu Rekrutamentu fó sai ne’e  nafatin mantein  ba tuir teste médiku.

Kandidatu Ajente Polísia Na’in-100 Submete Peteisaun ba PM Xanan ho PN

Kandidatu Ajente PNTL  na’in-100, Segunda ne’e, organiza malu hodi submete  karta petisaun ba iha Primeiru-Ministru (PM) Kay Rala Xanana Gusmão no Parlamentu Nasionál (PN) atu bele rezolve algesaun sira ne’ebé dekonfia hamosu favoritizmu no familiarizmu iha prosesu rekrutamentu kandetes foun PNTL.

Notísia Relevante: Deskonfia, Kandidatu Ajente PNTL ho Inisiál JGCM Laiha Diploma Sekundáriu Pasa Ba Teste Médiku

Porta-vos kandidatu ajente PNTL foun, Deolando Yano Mendonca, ba   jornalista iha resintu Palásiu Governu, afirma bainhira karta ne’ebé sira-nia parte submete ne’e mak laiha resposta pozitivu, maka sira sei organiza malu atu hakat ba faze asaun pasifiku.

“Karta petisaun sira ne’ebé mak hato’o ona tuir leí hateten mak la iha resposta nafatin,  ami sei organiza malu ba iha faze demonstrasaun,” Deolando Yano Mendonca hateten..

Nia haktuir, atu partisipa iha demonstrasaun ne’e sira sei hato’o karta ba iha universidade hotu-hotu, sosiedade sivíl, no mós ba instituisaun relevante sira, inklui mobiliza inan-aman husi kandidatu ajente PNTL sira nian.

Reportajen ekipa Rafa.tl