Setembru, Igreja ho Governu Translada Restus Mortais Bispu Na’in-tolu Husi Lisboa Mai TL

Bispu na’in-tolu ne’e mós aprezenta estrutura foun CET nian ba Primeiru-Ministru, Kay Rala Xanana Gusmão iha Palásiu Governu, Kinta (05/02/2026). Imajen/Mídia GPM

DILI, RAFA.tl– Conferência Episcopal Timorense (CET) hamutuk ho Governu iha ona planu halo transladasaun ba restus mortais Bispu da-huluk Timor nian, Dom. Jaime Garcia Goulart, Bispu da-ruak Dom. José Joaquim Ribeiro no Administradór Apostóliku Monseñor Martinho da Costa Lopes hosi Lisboa-Portugal mai Timor-Leste (TL), iha fulan-Setembru tinan 2026.

Notísia Relevante: Igreja ho Estadu Sei Koordena Halo Transladasaun Restus Mortais Dom Martinho Lopes ho Bispu Timoroan Na’in-rua iha 2026

Prezidente Conferência Episcopal Timorense (CET), Dom. Virgílio Cardeal do Carmo da Silva, SDB, Kinta (05/02/2026), hafoin enkontru ho Primieru-Ministru (PM), Xanana Gusmão iha Palásiu Governu, hateten   CET hasoru malu xefe governu Kay Rala Xanana Gusmão, hanesan vizita kortejia ida, no aprezentasaun Prezidente CET sesante no Prezidente foun CET ba Xefe Governu no mós diskute kona-bá preparasaun entre igreja no governu atu translada restus mortais Bispu sira mai iha Timor-Leste.

“Bainhira ko’alia kona-bá transladasaun ida-ne’e inisiativa ne’ebé ita fó sai tiha uluk ona, liu husi ami ba ko’alia ho Xefe Estadu José Ramos-Horta ne’ebé hanoin atu halo transladasaun restus mortais Monseñor Martinho Lopes, no Igreja mós sei translada hotu Primeiru Bispu Timor nian Dom. Jaime Goulart, no Segundu Bispu Dom. José Joaquim Ribeiro,” Prezidente Conferência Episcopal Timorense (CET), Dom Virgílio Cardeal do Carmo da Silva, SDB informa.

Igreja mós iha planu atu halót hikas restus mortais Dom. Alberto Ricardo ne’ebé durante ne’e halót hela iha semitériu Maloa sei halo prosesu restus mortais dala ida ho Bispu Na’in-tolu ne’e.

Governu iha ona resposta pozitivu husi Xefe Governu, atu nune’e, kolabora ho parte igreja hodi bele hahú kria komisaun ba eventu refere.

“Ba oin sei forma komisaun ida, atu nune’e, bele hala’o atividade ida -ne’e,’’ Amu-Bispu Metropolitanu Dili nian ne’e hateten.

Kardeál ne’e informa, restus mortais  Bispu Dom. Martinho Lopes no Bispu Timoroan na’in rua Dom. Jaime Goulart no Bispu José Joaquim Ribeiro hamutuk ho Bispu Dom. Alberto Ricardo sei halót iha Igreja Paróquia Sé Catedral Nossa Senhora Imaculada da Conceição Vila-Verde, Díli.

Iha hasoru-malu ne’e, Bispu na’in-tolu ne’e mós aprezenta estrutura foun CET nian ba Primeiru-Ministru, Kay Rala Xanana Gusmão.

Reportajen ekipa Rafa.tl