Deskonfia iha Indísiu Familiarizmu, PDHJ Sei Halo Fiskalizasaun Ba Rezultadu Teste Kadetes PNTL

Ajente PNTL foun la satisfas ho prosesu ba teste médiku ne'ebé deskonfia eskolla família de'it. Imajen/Rafa.tl

DILI, RAFA.tl– Provedoria Direitus Humanus no Justisa (PDHJ) sei halo fiskalizasaun ba rezultadu teste médiku kadetes  Polísia Nasionál Timor-Leste (PNTL) tanba deskonfia iha indísiu prátika familiarizmu iha prosesu rekrutamentu ne’e.

Notísia Relevante: Deskonfia, Kandidatu Ajente PNTL ho Inisiál JGCM Laiha Diploma Sekundáriu Pasa Ba Teste Médiku

Husi rezultadu rekrutamentu ba ajente foun PNTL ne’ebé komisaun rekrutamentu fó sai ba públiku, katak  iha ajente PNTL foun hamutuk na’in- 10,597 mak aprovadu,  maibé ajente foun 400 maka indikadu ba teste médiku.

Informasaun ne’ebé reprezentante kandidatu kadestes PNTL na’in-hitu husi sira-nain-50 ne’ebé submete keixa ba PDHJ, Kinta (05/02/2026), deskonfia mosu prátika familiarizmu no iha diskriminasaun ba prosesu aprovasaun kandidatu ajente PNTL, tanba iha lista ne’e kandidatu balun mai husi família, relasaun hanesan aman no oan, inklui inan ho oan, no balun veteranu nia oan, mak pasa ba teste médiku ho lista númeru ki’ik, maske balun valór hanesan ho kandidatu seluk no balun valór kiik liu kondidatu sira seluk.

Ho keixa ne’ebé kandidatu sira aprezenta ba iha PDHJ, Provedór Virgílio da Silva Guterres, konfirma, sei halo fiskalizasaun ba rezultadu lista 400 ne’e, bainhira iha duni prova familiarizmu,  PDHJ konsidera viola direitus umanus.

“Ha’u hanoin, iha nível polítika direitus umanus nian,  buat ne’ebé provedór advoga maka kualker prosesu rekrutamentu iha Polísia ka funsionáriu públiku no iha ne’ebé de’it, labele hamosu diskrimasaun  bazeia ba rasa, relijiaun no estatutu sosiál, rajaun ida ne’e mak lori PDHJ submete fiskalizasaun  abstrata ba Tribunál Rekursu, kona-bá norma ka regras ne’ebé diploma Governu nian sai  kuota ba Polísia nia oan ho porsentu 20, veteranu nia oan porsentu 20 ne’e tanba halo diskriminasaun bazeia ba estatutu sosial. Ida-ne’e viola direitus umanus,  no Tribunál deside ona katak prosesu ida ne’e nia norma inkonstitusionál,” Provedór Virgílio da Silva Guterres hateten ba jornalista sira hafoin rejista keixa husi kandidatu Ajente PNTL sira iha Edifísiu provizóriu PDHJ, Otél Excelsior, Praia dos Coqueirus, Kinta (05/02/2026).

Kona-bá deskonfia kandidatu ida ne’ebé pasa ba teste médiku maske laiha  diploma  sekundáriu,  Provedór promete sei halo fiskalizasaun ba kazu ne’e.

“Ami sei konsidera hanesan alegasaun no lamentasaun reklamasaun  husi públiku nian, justifika ida-ne’e presiza iha fiskalizasaun atu hetan prova no kuandu iha prova ona, ida-ne’e bele sai baze ba ita atu pronúnsia katak ida ne’e diskriminasaun ka familiarizmu, agora Provedór seidauk bele pronúnsia kona-bá ida-ne’e,” eis prezidente Conselho de Imprensa de Timor-Leste ne’e hateten.

PDHJ sei haruka ekipa fiskalizasaun atu buka hatene problema ba kandidatu sira ne’ebé aprovadu hamutuk 10,597,  maibé kandidatu 400 de’it mak bele passa ba teste médiku.

PDHJ sei orienta mós ekipa legál atu halo konfirmasaun hodi análiza ba dokumentu legál ne’ebé Jornál da Repúblika publika ka fo sai kona-bá prosesu rekrutamentu ne’e atu haré mekanizmu sira  ne’ebé sai iha Jornál da Repúblika  nia prosesu ne’e eleminatóriu ka akumalativu. Nune’e, Provedór bele halo rekomendasaun ba Ministériu Interiór ho Komandu Jerál PNTL.

Reportajen ekipa Rafa.tl