Deskonfia, Kandidatu Ajente PNTL ho Inisiál JGCM Laiha Diploma Sekundáriu Pasa Ba Teste Médiku

Ministru Interiór, Francisco da Costa Guterres. Imajen/Rafa.tl

DILI, RAFA.tl-Deskonfia, kandidatu ajente Polísia Nasionál Timor-Leste (PNTL) ho inisiál JGCM laiha diploma sekundáriu, maibé pasa ba teste médiku tanba deskonfia fasilita husi nia inan rasik Inspetora Xefe Polísia ho inisiál EGP no hola parte hanesan komisaun rekrutamentu  PNTL 2025.

Notísia Relevante: Kandidatu Ajente PNTL Na’in-400 Pasa Ba Teste Médiku

Tuir fontes ofisiál Superiór ida iha instituisaun PNTL ne’ebé  husu atu la bele publika nia  identidade (fontes anonimatu), Kuarta (04/02/2026), informa ba Rafa.tl katak, iha kadetes foun PNTL ho inisiál JGCM moris iha loron 10 fulan-Agostu 2007, ne’ebé pasa iha selesaun dokumentu, teste kulturál, aptidaun fíziku, psikolojia no entrevista professional, maibé laiha diploma sekundária, tanba kadetes ne’e rasik foin pasa iha ezame nasionál iha tinan letivu 2025 husi Eskola Tékniku Vokasionál Becora ho númeru emis 723267.

Fontes ne’e esplika, durante prosesu selesaun la’o, kadetes sira ne’ebé inan no aman hola parte iha komisaun rekrutamentu no hanesan ofisiál Superiór iha instituisaun PNTL lori sira nia oan ba sukat altura iha oras loraik, no kadavez kalan, atu públiku labele hatene.

“Estrutura sira husi komisaun rekrutamentu tama hotu iha lista, bele haré iha lista kada Munisípiu. Kadetes foun sira ne’e balun nia inan ho aman ho diviza Superintendente asistente no Inspetora Xefe,” fontes ne’e informa.

Nia hatutan, maioria husi kadetes foun sira ne’ebé hanesan oan husi komisaun rekrutamentu no ofisiál Superiór PNTL nian sira ne’ebé pasa ba teste médiku mak hanesan kadetes ho inisiál RHAC, CMM, DFF, JXB no ZJZZM.

Hatán ba iregularidade iha teste kadetes foun PNTL sira nian ne’e, Ministru Interiór, Francisco da Costa Guterres hatete, kona-bá iha iregularidade ba lista ajente PNTL foun na’in-10.595 ne’ebé aprovadu ba faze teste médiku ne’e, presiza aprezenta  evidénsia no  halo reklamasaun para komisaun halo supervizaun hodi hare.

Nia hatutan, Ministériu Interiór  sei foti medida sansaun hasai husi lista, inklui Superiór PNTL ho komisaun rekrutamentu nia oan bainhira identifika ho faktu no prova sira sufisiente.

“Ha’u seidauk verifika. Sei fó oportunidade ba sira atu halo reklamasaun, depois mak  ekipa sei haré hotu, haré reklamasaun ida ne’ebé mak los, tanba ne’e fó oportunidade loron-10 ba  sira atu halo reklamasaun. Kuandu los, sei foti desizaun, haré ba iha iregularidade, sei fó sansaun depende ninia pena tuir gravidade, se o tama la liu husi prosesu ida normal, ita haré tok nia ne’e merese duni tama ka lae, tenke haré ida ne’e hotu,”  Ministru Interiór Francisco da Costa Guterres, hateten ba jornalista sira iha Palásiu Governu, Kuarta (4/02/2026).

Governante husu dadus kona-bá Komisaun Rekrutamentu ho Polísia Superiór nia oan sira ne’ebé deskonfia tama iha lista ba kandidatu ajente PNTL na’in-10.595 ne’ebé aprovadu ba faze teste médiku ba vaga hamutuk 400 iha PNTL..

“Ha’u ladún hatene, tanba ida ne’e ita bele halo alegasoens ba malu, ha’u lahatene tanba komisaun supervizaun iha deputadu na’in-rua iha laran, husi opozisaun ida, no governu nian ida, iha mós jerasaun Patriota, NGO, Palásiu Prezidensiál iha hotu laran, ne’ebé sira ne’e mak haré hotu, sira akompaña, monitoriza hodi fiskaliza, tanba ne’e mak hasai rezultadu ne’e. Ita haré took, se iha reklamasauns, depois ita hare,” Ministru Francisco da Costa Guterres afirma tan.

Governante ne’e subliña, kandidatu ajente PNTL foun ne’ebé aprovadu atu halo protestu hasoru Komisaun Rekrutamentu ba lista númeru  10.595  ne’ebé aprivadu ba teste médiku  ne’e, sira iha oportunidade loron-10 halo reklamasaun, regras iha ne’ebá.

“Hatama mai ita haré, ita tenke kumpri regra, rihun ida konkore vaga, hakarak tama hotu ne’e dalan laiha. Sira balun la aprovadu hodi labele ba tuir teste médiku tanba  vaga ne’e ba deit na’in-400,” Ministru Frnacisco da Costa Guterres tenik.

Nia informa, lista kandidatu kadetes foun PNTL ne’ebé pasa ba teste médiku, informa ona ba Primeiru-Ministru Kay Rala Xanana Gusmão ne’ebé kontinua la’o tuir desizaun ne’ebé iha.

Rafa.tl tenta konfirma ho porta-voz Komisaun Rekrutamentu PNTL 2025, Superintendente António da Luz, maibé simu orientasaun husi superiór katak hein lai tanba foin halo konferénsia imprensa kona-bá rezultadu iha  Tersa (03/02/2026).

“Boa tarde alin, ha’u foin husu orientasaun husi excelência Prezidente Júri kona-bá entrevista, excelência presidente júri  responde, hein lai tanba horseik ita foin halo konferénsia emprensa. Obrigadu,” Superintendente António da Luz responde mensajen liuhosi kontaktu WhatsApp.

Iha fatin seluk, Porta-voz kadetes foun aprovadu, Deolando Mendonça hatete, lamenta ho rezultadu ne’ebé Sekretariadu Rekrutamentu ba Ajente PNTL foun 2025 fó sai ba públiku, tanba iha kandidatu balun valór boot la tama iha lista númeru 10.595.

“Ohin loron, ami mai iha Ministériu Interiór, maske ema oituan, maibé ami reprezenta kandidatu iha teritóriu Timor laran tomak ne’ebé pasa ona, maibé ho problema ne’ebé la hanesan, tanba ne’e rekrutamentu ne’e transparente, maibé ikus mai iha fali problema, ami tenke mai hato’o ami nia ejizénsia no lamentasaun, tanba iha prosesu rekrutamentu ida-ne’e, balun tuir teste ho valór boot, ikus mai la pasa  iha númeru 400 ne’ebé atu avansa ba tuir teste médiku,” Deolando Mendonça haktuir iha resintu Ministériu Interiór, Kuarta (04/02/2026).

Kadetes foun sira ne’ebé aprovadu husu nafatin komisaun rekrutamentu nia responsabilidade, atu nune’e, labele husik hela dúvida ba públiku, liu-liu tanba kadetes ne’ebé valór boot la tama iha lista 400 maibé kandidatu seluk ho valór ki’ik mak pasa fali no tuir ezame médiku.

Lihusi konferénsia imprensa iha Sentru Formasaun Akademia Polísia, Comoro, Díli, Tersa (03/02/2026), Portavós Komisaun Juri bá  Rekrutamentu  membru PNTL tinan 2025, Superintendente Polísia António da Luz, informa kandidaru ajente foun PNTL hamutuk na’in-10.595, kompostu husi mane 7.716 ho feto 2.881 aprovadu ba faze teste médiku iha Ospitál Nasionál Guido Valadares (HNGV) hodi konkore ba vaga 400.

Kandidatu ajente foun PNTL ne’ebé la aprovadu  ka reprovadu ba vaga 400 ne’e totál mane 1.787 no feto 490 hamutuk  na’in-2.277.

Reportajen ekipa Rafa.tl