Tinan ne’e, PNTL ho MI Konstrui Kazerna 62 no Eskuadra 50

Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa. Imajen/Rafa.tl

DILI, RAFA.tl– Polísia Nasionál Timor-Leste (PNTL)  ho Ministériu Interiór (MI), hahú hikas halo verifikasaun no levantamentu ba rai sira, atu konstrui tan Kazerna 62 no eskuadra 50  tuir planu asaun Ministériu Interiór nian iha tinan 2026.

Komandante Jerál PNTL, Komisáriu Jerál Polísia Henrique da Costa ba jornalista sira iha Komandu Jerál PNTL, Kuarta (04/02/2026) hatete, nia halo  enkontru ida ho Komandante Polísia Munisípiu sira,  oinsá maka Komandante Munisípiu sira presiza oferese dadus ba Komandu Jerál, hodi nune’e, ekipa husi parte ministériu nian no mós ekipa husi Direasaun Jerál Terras no Propriedade bele kobre dadus hirak ne’e hodi bele halo  koordenasaun.

“Ita husu ba Komandante Polísia Munisípiu sira atu nune’e atividade sira hala’o ne’e tenke passa relatóriu mai,  nune’e ita kontinua priense iha parte planeamentu ninian hodi manda ba iha governu,” Komisáriu Jerál Polísia Henrique da Costa hateten.

Komandante Jerál  PNTL ne’e hatutan, dau-daun ne’e servisu balu kona-bá konstrusaun postu Polísia sira komesa la’o ona, balu mós iha hela prosesu nia laran, ho esperansa katak tinan 2026 konstrusaun ba área ne’ebé maka presiza harí postu Polísia bele kobre hotu.

Iha fatin hanesan, Xefe Unidade Apóiu Tékniku husi Ministériu Interiór, Adelino Soares Amaral  afirma, kona-bá rai, sira nia parte halo konkordánsia ho PNTL ne’ebé hanesan na’in ba projetu no Ministériu Interiór, hanesan implementadór ba projetu refere no dau-daun ne’e implementa ona projetu ne’e ba eskuadra hamutuk 15, hela tan 50-resin atu kompleta halo 68.

‘’Ita hadi’a husi kraik, tanba projetu ne’e ba atendimentu públiku iha terrenu, entaun kazerna agora ne’e tolu iha ona, falta 62 para kompleta 65,‘’ Adelino Soares Amaral hateten.

Tuir alvu Ministériu Interiór, tinan ida ne’e, tenke harí kazerna 62 no eskuadra 50 tuir polítiku Ministériu Interiór nian ne’ebé sei iha bairu Polísia hamutuk 12 no finaliza ona 8, hela 4 maka seidauk.

Ba iha eskuadra tipe B, ne’ebé akumula munisípiu 14, ne’ebé sei harí bairu Polísia tuir alvu unidade 50 no reduz ba iha 25.

Reportajen ekipa Rafa.tl