Kandidatu Ajente PNTL Na’in-400 Pasa Ba Teste Médiku

Komisaun Rekrutamentu PNTL 2025 fó sai rezultadu rekrutamentu liuhosi konferénsia imprensa iha Sentru Formasaun Akademia Polísia, Comoro, Tersa (03/02/2026). Imajen/Rafa.tl

DILI, RAFA.tl – Kandidatura ajente Polísia Nasionál Timor-Leste (PNTL) hamutuk na’in-400  pasa husi teste kulturál, aptidaun fiziku, psikolojia no entrevista profísional sei ba teste médiku iha Ospitál Nasionál Guido Valadares (HNGV).

Notîsia Relevante: Kadetes PNTL Sei Kontinua Teste Saúde

Portavós Sekretariadu Rekrutamentu PNTL 2025, Superintendente Polísia António da Luz, Tersa (03/02/2026), liuhosi konferénsia imprensa iha Sentru Formasaun Akademia Polísia,  Comoro, hateten rezultadu ba kandidatu ajentes PNTL foun  ne’ebé pasa ona husi faze teste kulturál,  aptidaun fiziku, psikolojia no entrevista profisionál  hamutuk na’in-400 maka hetan valor boot no sei ba tuir teste médiku iha Ospitál Nasionál Guido Valadares (HNGV).

“Presiza de’it kandidatu na’in-400 tuir kuota ne’ebé kada munisípiu nian, ne’ebé ba teste saúde, balun deteta moras maka munisípiu ne’ebé mak kandidatu ne’e moras sei bolu fali kanditua tuir mai. Ezemplu presiza kandidatu na’in-20, ne’ebe husi númeru 1-20, no entre sira ne’e ida hetan moras númeru 21 avansa kedas, ne’e mak husu ba kandidatu atu sira númeru kontaktu sira ativu para Sekretáriadu bele halo kontaktu ho kandidatu sira ne’ebé ba teste médiku karik detekta moras, ne’ebé rejultadu ikus teste médiku nian sei fó sai ba públiku,” Superintendente Polísia António da Luz esplika.

Sektáriadu Rekrutamentu  husu kandidatu atu haré oráriu ba naran iha lista ne’ebé taka iha  Komandu Polísia Munisípiu ida-idak, nune’e bele mai tuir ezame médiku iha HNGV.

Kalendáriu ba prova médika ba kandidatu sira ne’ebé aprovadu ho valor másimu ba munisípiu tuir kuota ne’ebé terminadu sei mai tuir teste médiku tuir orariu ne’ebé maka fó sai, katak sei hahú iha loron 10 to’o  loron 18 fulan-Fevereiru 2026, hahú husi Munisípiu Aileu.

Superintendente Polísia ne’e husu kandidatu sira ne’ebé atu tuir teste médiku iha loron 10 fulan-Fevereiru ne’e, atu aprezenta aan iha Sentru Formasaun Polísia Akadémia Comoro, iha oras 04:30, nune’e tuku 5:00 dadeer, karreta husi Polísia nian transporta ba iha HNGV hodi teste médiku nian.

Kandidatu sira lori ho resivu prova kulturál no intervista nian ne’ebé hetan asinadu husi intervistador sira, Kartaun Eleitorál orijinál ho Kartaun Billeti Indentidade orijinál.

Tuir rejultadu ba   kandidatura sira ne’ebé pasa ka aprovadu no la aprovadu husi Munisípiu 14, hanesan tuir mai ne’e aprovadu, mane hamutuk 7716, feto 2881, totál 10,597 no la aprovadu totál  mane 1787, feto 490 hamutuk 2277.

Husi númeru kandidatu 10,597, maibé iha kandidatu 400 mak hetan oportunidade  atu tuir teste, hanesan husi Munisípiu Aileu kandidatu na’in-20 , Ainaro 25, Ataúro 10, Baucau 40, Bobonaro 40, Covalima 25, Díli 40,   Ermera 37, Lautem 27, Liquiça 26, Manatuto 25, Manufahi 25, RAEOA 25 no Viqueque 35 totál na’in-400.

Reportajen Ekipa Rafa.tl