Coração F.C Rekolla Pontu Tolu Hafoin Halakon Fitun Estudante Lorosa’e F.C ho Skor 2-1

Ekipa Coração F.C. Imajen/Rafa.tl

DILI, RAFA.tl– Coração F.C susesu rekolla pontu tolu iha jogu daruak grupu C Taça da Liga FFTL hafoin halakon nia adversáriu Fitun Estudante Lorosa’e F.C ho eskor 2-1.

Notísia Relevante: Taça da Liga, Fitun Estudante Lorosa’e F.C iha Ambisaun Manán Coração F.C

Jogu entre ekipa rua ne’ebé hala’o iha Estádiu Munisipál Díli, Sábadu (31/01/2026), bainhira árbitu huu apitu sinál jogu hahú, ekipa Coração F.C halo kedas jogu hodi buka domina kampu klaran ho intensaun halo presaun ba adversáriu no tenta halo uluk golu.

Ekipa Fitun Estudante Lorosa’e F.C mós hatudu jogu ida kapás no halo balansu ba ekipa Coração F.C nia jogu hodi buka oportunidade atu hatama  uluk golu hodi lidera jogu ne’e.

Ekipa riu mantein ho jogu ida disipliña no halo kontra atake ba malu. Ho oportunidade ne’ebé iha, Fitun Estudante Lorosa’e F.C liu husi jogadór Lourenço Ximenes marka uluk golu ida iha minutu 19 hodi muda skor ba 1-0.

Ekipa Coração F.C halo kedas reasaun no buka oportunidade hodi halo impata liu husi jogadór Miguel Barbosa hodi muda skor ba 1-1 no to’o jogu primeira parte termina ekipa rua mantein impata.

Tama ba segunda parte, ekipa rua mantein ho tátika ne’ebé iha no hahú halo tranzisaun ba liña jogadór iha kada área hodi buka oportunidade atu aumenta tán golu.

Fitun Estudante Lorosa’e F.C halo mudansa iha liña avansadu hodi hasa’e liután nia intensidade jogu, maibé Coração F.C konsege kontrola ho másimu hodi domina bola no tama ba minutu 81, jogador Coração F.C Rofino Gama marka golu ida hodi muda skor ba 2-1.

Rofino Gama  nia golu ne’e mak lori vitóri ba ekipa Coração F.C hodi hetan pontu tolu no lidera provizoriamente tabela klasifikasaun grupu C ho pontu haat husi jogu rua.

Treinadór Coração F.C, Gaspar Amaral hateten pontu-tolu ne’e importante no agradese ba jogadór sira hotu.

“Iha jogu primeira parte ami nia ekipa komete erru barak no adversáriu sira konsege aproveita no halo uluk golu, maibé ami konsege halo impata no ikus mai manan jogu ne’e,” Gaspar Amaral hateten.

“Ami hanoin vitória ne’ebé ami hetan importante tebes, ba oin, ami hakarak halo di’ak,” Gaspar Amaral tenik.

Iha fatin hanesan treinadór Fitun Estudante Lorosa’e F.C, Hermelo José Pereira hateten iha jogu ne’e sira nia ekipa halo esforsu másimu atu hetan vitória, maibé falla ne’e mak jogu no ba oin sei nafatin halo preparasaun ba jogu ikus hasoru F.C Porto Taibessi.

Treinadór Fitun Estudante Lorosa’e F.C ne’e mós husu atu kompetisaun Taça da Liga FFTL labele para deit iha ne’e, maibé kontinua ba oin, hodi dezenvolve di’ak liután futeból iha Timor-Leste sai orgullu nasionál.

Reportajen ekipa Rafa.tl