Sentru Saúde Vera-Cruz Rejista Pasiente Dengue 136 Maioria Labarik ho Tinan Lima ba Kraik

Pasiente dengue halo tratamentu iha Sentru Saúde Vera-Cruz, Sesta (30/01/2026). Imajen/Rafa.tl

DILI, RAFA.tl – Iha fulan-Janeiru tinan 2026, Sentru Saúde Vera-Cruz rejista pasiente ho moras dengue 136, ne’ebé halo hela tratamentu intensivu iha internamentu. Pasiente dengue sira-ne’e maioria labarik ho idade tinan lima ba kraik.

Notísia Relevante: HNGV Rejista Kazu Dengue 245 no Na’in-haat Lakon Vida

Xefe Sentru Saúde Vera-Cruz, Marília Ferreira da Conceiҫão Piedade ba Rafa.tl Sesta (30/01/2026), hateten husi númeru pasiente dengue ne’e, maioria pasiente sira  labarik idade ki’ik, inklui adultu balu, no pasiente hirak ne’e transfere husi Sentru Saúde sira iha kapitál Díli, hanesan husi Sentru Saúde Comoro ho Becora.

Nia esplika, dadus dengue ne’ebé mak Sentru Saúde Vera-Cruz iha hamutuk 136 no Sentru Saúde Vera-Cruz hanesan mós fatin internamentu ka fatin ba baixa nian ne’ebé simu transferénsia mai husi Sentru Saúde Comoro no Sentru Saúde Becora.

“Ita nia pasiente agora dau-daun baixa iha ne’e barak mak alta ona, no barak mak haruka ba HNGV, tanba ho diagnosa katak, ne’e dengue moderadu. Agora dau-daun, sala-neen nakonu hotu, husi sala A to’o extra pasiente nakonu hotu. Dengue ne’e la akontese de’it ba labarik menoridade sira husi tinan 5 mai kraik, maibé  adultu mós kona hotu, no agora dau-daun baixa hotu iha Sentru Saúde internamentu,” Xefe Sentru Saúde Vera-Cruz, Marília Ferreira da Conceiҫão Piedade hateten.

Nia hatutan,  dau-daun ne’e ekipa Sentru Saúde Vera-Cruz ho promosaun edukasaun saúde ambientál, inklui estudante Universidade Dili (UNDIL), divulga ona informasaun kona-bá prevensaun moras dengue, no husu mós ba komunidade sira atu lori lalais oan sira ba Sentru Saúde ne’ebé besik, karik deteta hetan sintoma dengue.

“Sentru Saúde Vera-Cruz  rejistu ho pasiente dengue maka’as iha Postu Administrativu Vera-Cruz, hanesan Caicoli, Lahane Osidental, no Vila-verde,” nia hateten.

Xefe Sentru Saúde Vera-Cruz ne’e mós apela ba inan-aman sira atu kuidadu oan sira ho maneira uza ai-moruk susuk nian, no uza faru liman naruk no kalsa naruk,  bainhira deskansa,  no uza muskiteiru.

Husu mós ba komunidade sira  kontinua halo  limpeza  iha uma-laran, inklui uma-ninin sira halo mós no maran, hakohi lata mamuk, pineu,  no vazu ai-funan ne’ebé nakonu ho bee tenke troka kada loron, no fakar sai bee no labele husik bee nalihun.

Reportajen ekipa Rafa.tl