PNTL Servisu Maka’as iha Liña Fronteira Hodi Kombate Sasán Ilísitu

Porta-vos interinu komandu jerál PNTL , Superintendente Asistente Polísia Mouzinho Tavares Correia (klaran) atualiza informasaun ba jornalista sira iha Ministériu Interiór, Kinta (22/01/2026). Imajen/Rafa.tl

DILI, RAFA.tl– Polísia Nasionál Timor-Leste (PNTL) liu husi Unidade Patrullamentu Fronteira (UPF), Unidade Polísia Marítima (UPM), no mós ekipa sekreta, halo vijilánsia másimu iha liña fronteira hodi kombate sasán ilísitu sirkula iha teritóriu nasionál.

Porta-voz Interinu Komandu Jerál PNTL, Superintendente Asistente Polísia Mouzinho Tavares Correia hatete, semana rua ikus ne’e, kuaze kazu ne’ebé relasiona kontra bandu ne’e menus kompara iha fulan-Dezembru tinan 2025.

“Ida-ne’e parte seguransa patrullamentu aumenta, tanba ne’e mak númeru ne’e menus iha semana ikus ne’e,” Superintendente Asistente Polísia Mouzinho Tavares Correia informa ba jornalista sira iha Ministériu Interiór, Kinta (22/01/2026).

Porta-voz Interinu  Komandu Jerál PNTL ne’e hatutan, sasán ilísitu sira ne’ebé kontínua sirkula iha merkadu, ba oin Polísia sei koordena ho parte AIFAESA,I.P ho autoridade sira seluk hodi halo fali operasaun.

“Iha operasaun konjunta realiza iha tinan kotuk Polísia Nasionál Timor-Leste, AIFAESA,I.P ho Servisu Nasionál Intelijénsia (SNI) ho tan autoridade sira seluk, ita konsege rekolla sigaru lubuk ida, ida-ne’e parte ida fó presaun ba ema sira gosta hatama sasán illegal sira ne’e, ne’ebé ho rezultadu ida ne’e ita haré númeru ne’e menus, maske seguru uitoan-uitoan sei iha, maibé ho kuantidade boot ne’e durante fulan ida nia laran ita haré laiha,” Superintendente Asistente Polísia Mouzinho Tavares Correia hateten.

Nia subliña liután katak, atu kombate sasán ilísitu sirkula iha teritóriu nasionál no merkadu sira iha rai-laran, presiza kolaborasaun komunidade hotu nian hamutuk ho autoridade seguransa.

Reportajen ekipa Rafa.tl