Karketu Díli F.C iha Ambisaun Boot Sai Kampiaun Taça da Liga 2025

Ekipa Karketu Díli F.C halo preparasaun atu enfrenta jogu kontra As Marca iha Taça da Liga 2025. Imajen/Rafa.tl

DILI, RAFA.tl- Ekipa estimadu komunidade kapitál Díli, ne’ebé ho naran Matak Malirin, Karketu Díli F.C garante manán As Marca iha primeiru jogu, nune’e bele hahú atinje sira-nia mehi boot ka ambisaun boot sai kampiaun Taça da Liga 2025. Prezidente Karketu Díli F.C, Luís de Oliveira ba Rafa.tl iha nia rezidénsia Bemori, Díli, Kinta (22/01/2026) hatete, ekipa Karketu Díli F.C iha preparasaun másimu no tau importánsia ba jogu Taça da Liga  atu sai kampiaun.

Notísia Relevante: Coração F.C iha Ambisaun Manán, F.C Portu Taibessi Garante Asegura Pontu Tolu

Nia hatutan, Karketu Díli F.C nia preparasaun ba jogu primeiru Taça da Liga hasoru As Maca ne’e másimu, hahú husi jogadór no ofisiál  sira servisu hamutuk hodi  konsentra loos ba jogu primeiru ida ne’e. Alvu Karketu Díli F.C nian pontu tolu, atu nune’e, bele avansa ba segundu jogu hodi hasoru Santa-Cruz F.C, no iha jogu segundu ne’e mós ami nia lavu rekolla pontu tolu nafatin.

“Karketu klubu ida ne’ebé mak sempre iha alvu ba sai kampiaun, tanbasá mak ami sempre iha alvu, tanba ami iha preparasaun másimu ba kada torneu.  Antes ne’e, ami hasoru ona As Marca iha liga, liga ho Taça da Liga la hanesan, As Marca mós ekipa ida di’ak, maioria ekipa ne’e di’ak hotu, maibé ami sempre konsidera nafatin, Karketu sempre konsidera ekipa hotu, maibé ami ko’alia liu ba ami nia parte katak, ami prontu para atu foti trés pontus,” Prezidente Karketu Díli F.C, Luís de Oliveira hateten.

Iha parte seluk, Prezidente   AS Marca, Luís Evaresto dos Santos Soares hatete, Karketu hanesan ekipa zigante, maibé ekipa As Marca preparadu hodi kompete no iha mos  ambisaun hodi hetan pontu tolu.

Prezidente klubu ne’e hatutan, iha Taça da Liga ne’e, hotu-hotu hatene katak grupu ida iha klubu tolu de’it, klubu tolu ne’e, klubu ida sei joga dala-rua, no As Marca iha jogu primeiru hasoru Karketu Díli F.C no segundu jogu hasoru Santa Cruz F.C.

“Ami hanoin katak, ami laiha alvu, maibé ami iha konfiansa katak kualker jogu iha minutu 90 mak determina, maibé ekipa preparadu. Atu hatete katak, As Marca la hakfodak atu joga hasoru Karketu, no prontu atu batalla no prontu atu manán,” prezidente   AS Marca, Luís Evaresto dos Santos Soares hateten.

Treinadór As Marca, Francisco Araújo hatete, maske Karketu hanesan ekipa zigante, maibé fiar katak ekipa mós sei halo presaun ba Karketu Díli F.C iha minutu 90 nia laran durante jogu.

Nia argumenta katak, liga tinan kotuk As Marca derota husi sira ho skor 4-0, ne’e hanesan motivasaun ida ba ekipa para bele hasoru ekipa boot sira hanesan ne’e, tenta atu joga ho livre, joga nakloke, atu nune’e bele hatene forsa ekipa ne’e to’o iha ne’ebé. Manán, lakon, impata ida ne’e rezultadu jogu nian, maibé As Marca nafatin partisipa ho kompetetivu.

“Ami nia preparasaun ami bele dehan  katak másimu, ba iha jogu rua ne’e ami iha preparasaun totál kuaze fulan ida, ami halo ami nia distribuisaun ami nia karga treinu ne’ebé natón,  maske ho jogadór ne’ebé mak maioria lokal atu kompete iha Taça da Liga liga ida ne’e, iha jogadór lubuk ida estranjeiru ne’ebé mak nia negosiasaun la konsege partisipa iha Taça da Liga ida ne’e,  karik sira sei prepara fali  ba liga, entaun iha objetivu ba Taça da Liga ida ne’e,  ami atu haré liu jogadór lokál sira ne’ebé mak hodi bele prepara ba liga ne’ebé mak sei tuir mai,” hatete Francisco Araújo.

Ekipa Karketu Díli F.C kontratu ona jogadór estranjeiru na’in-tolu husi nasaun Nigéria no Ghana hodi reforsa ekipa Matak Malirin iha Taça da Liga, no parte As Marca mós kontratu jogadór estranjeiru na’in-tolu  husi Indonésia hodi reforsa ekipa, ba kompetisaun Taça da Liga FFTL 2025.

Reportajen ekipa Rafa.tl