CAC ho KPK Assina MoU iha Área Prevensaun no Kombate Korrupsaun

CAC ho KPK-Indonézia asina MoU iha Jakarta iha loron 14 fulan-Janeiru 2026. Imajen/Média CAC

DILI, RAFA.tl– Komisaun  Anti-Korrupsaun (CAC, sigla portugés) no Komisi Pemberantasan Korupsi (KPK)-Indonézia, Kuarta (14/01/2026), iha Jakarta,  asina Nota de Entendimentu (MoU, sigla Inglés)  iha área prevensaun no kombate korupsaun.

Objetivu husi MoU ne’e nu’udár pasu ida atu kontínua hametin kooperasaun internasionál no kolaborasaun institusionál entre instituisaun rua iha área prevensaun no kombate korrupsaun.

Komisáriu CAC, Rui Pereira dos Santos, ba jornalista sira iha Salaun Enkontru CAC, Farol Díli, Kuarta (21/01/2026), esplika nota de entendimentu ne’e halo kooperasaun entre KPK-Indonézia ho CAC Timor-Leste tanba CAC mós sai ona membru ba Banku Aziátiku ba dala-11, ho nune’e, presiza halo kooperasaun atu  iha kazu krime korrupsaun ne’ebé mak liga ho aset, CAC mós bele husu tulun ba sira.

“Hanesan ema Timoroan sira mak loke sira nia konta bankaria, sosa rai, no sosa uma iha Indonézia karik halo krime ruma ita-nia autoridade labele hakat liu nasaun seluk tanba ne’e ho memorandu ita asina ne’e karik ligasaun ho ema estranjeiru mak halo krime korrupsaun iha Timor-Leste ita mós bele husu tulun KPK atu fornese informasaun, hodi nune’e, sira bele buka tuir iha ne’ebá,” Komisáriu CAC, Rui Pereira dos Santos espalika.

Iha futuru  CAC Timor-Leste no KPK-Indonézia mós sei fahe esperiénsia kona-bá kaer kazu no jere rikusoin ne’ebé hetan hosi krime korrupsaun, atu nune’e, bele implementa prátika diak liután iha instituisaun ida-idak nia laran, tantu Timor-Leste no iha Indonézia.

Komisáriu CAC, Rui Pereira dos Santos hatutan, kooperasaun entre CAC ho KPK-Indonézia ne’e inklui mós hadi’a regulamentu hodi aliña ho padraun globál, nune’e labele iha lakuna legál ne’ebé kriminozu sira bele esplora hodi eskapa husi krimi korrupsaun iha Timor-Leste ho Indonézia.

Iha fatin hanesan, reprezentante Komandu Jerál Polísia Nasionál Timor-Leste (PNTL), Superintendente Xefe Polísia José Soares, dehan PNTL hanesan autoridade estadu ida prontu iha kualker tempu atu servisu ho instituisaun hotu-hotu hodi garante seguransa no hamutuk ho CAC hodi kombate aktu sira ne’ebé mak kontra lei, liu-liu uza sala osan Estadu nian.

“Kuandu instituisaun hotu-hotu ita servisu ho kooperasaun ne’ebé mak di’ak, ita sei garante katak ita-nia Estadu ne’e iha integridade iha akuntabilidade, ikus mai povu sei moris ho kondisaun ne’ebé mak ho dignu no prosperiedade,” Superintendente Xefe Polísia José Soares hateten

Iha serimónia asina MoU ne’e fó énfaze ba kapasitasaun institusionál, apóiu mútua hodi fahe informasaun relasiona ho korupsaun no brankeamentu kapitál no krimi korrupsaun.

Kooperasaun bilaterál ne’e sei hala’o tuir rekursu ne’ebé iha no tuir lei no regulamentu nasaun ida-idak nian.

Akordu ne’e importante ba CAC atu afirma kompromisu husi instituisaun rua; CAC Timor-Leste ho KPK-Indonézia atu garante prátika korrupsaun sira la subar ona iha fronteira nasionál nia kotuk, tuir prinsípiu sira kona-ba transparénsia, responsabilizasaun, no estadu direitu ne’ebé haruka husi Konvensaun Nasoins Unidas Kontra Korrupsaun (UNCAC).

Reportajen ekipa Rafa.tl