Kondisaun Trotoar no Estrada iha Kapitál Díli Kontinua Fó Ameasa Ba Komunidade

Kondisaun trotoar la seguru ba komunidade la'o ain sira iha tempu udan. Imajen/Rafa.tl

DILI, RAFA.tl– Kondisaun infraestrutura, liu-liu estrada no trotoar iha kapitál Díli kontinua lori dezafiu ba komunidade sira tanba ku’ak no aat, bainhira komunidade sira ultrapassa bele monu no lori ema ba asidente ne’ebé halo kánek, tohar no bele lakon vida.

Ho kondisaun estrada no trotoar ne’ebé aat no ku’ak fó perigu ba ema nia vida, liuliu ba labarik sira, ema ho defisiénsia, inan-isin rua no idozu sira, tanba bainhira ultrapassa bele monu ba estrada no trotoar nia ku’ak, no bele hamosu asidente grave ba motór ka karreta, tanba motorista bele dezvia husi diresaun no hamosu interrupsaun iha servisu emerjénsia nian.

Xefe Suku Santa Kruz, Marciano Juvinal, ba Rafa.tl iha nia servisu fatin, iha Santa Kruz, Tersa (20/01/2026), hatete,  iha Suku Santa Kruz iha mós trotoar, maibé trotoar nia funsaun ne’e ba ema la’o ain sira, iha fatin balun iha ona trotoar balun fali mós seidauk.

Nia hatutan, iha trotoar balun di’ak no balun mós ladi’ak, ku’ak no aat ona, nune’e iha tempu udan ema la liu husi trotoar tanba ta’uk, valeta mós be nakonu, balun sobu fali trotoar hodi uza ba dalan hodi halo atividade sira hanesan loja sira ne’e.

“Ha’u halo ona intervensaun ida kona-bá ema balun sobu trotoar hodi haruka fila-fali atu hetan autorizasaun ruma husi parte estadu liu-liu Ministériu Obras Públikuy. Karik laiha autorizasaun labele, lae ema sobu trotoar, halo fali dalan ba sira nia loja.Bainhira tempu udan iha Suku Santa Kruz bee sa’e maka’as iha dalan, tanba bee dalan ka valeta mak klot, rai mós sa’e maka’as, pesoál husi parte balun mai halo ona limpeza no hamós valeta, maibé nafatin de’it,” Xefe Suku Marciano Juvinal hateten.

Autoridade lokál ne’e haforsa, problema sira ne’e bainhira iha enkontru ruma sempre hato’o hela kona-bá inundasaun, valeta no trotoar sira ne’e, maibé parte relevante sira seidauk iha asaun ruma.

Preokupasaun sira ne’e hato’o ona ba parte kompetente, liu-liu ba Ministériu Obras Públiku iha Munisípiu no Nasionál  bele halo ona indentifikasaun no mobiliza materiál sira oinsá haré valeta no trotoar sira.

“Foin dau-dauk ha’u halo ona enkontru iha Munisípiu atu forma ekipa taskforce  atu haré liubá prevensaun dezastre naturál ne’ebé sei mai. Tanba ne’e ekipa sira tenke identifika poténsia ida ne’ebé mak bele kria dezastre natural,” nia tenik.

Iha sorin seluk, komunidade Agustinho da Cruz Babo dehan,  motorista balun lahatene ku’ak sira ne’ebé iha estrada klaran, nune’e iha tempu udan bee nalihun ona, sira balun tenke monu tun ba ku’ak ne’e.

“Husu ba parte kompetente liu-liu Ministériu Obras Públika atu tau matan no hadi’a netik ba valeta ku’ak sira ne’ebé sempre fó ameasa ba ema nia vida iha tempu udan monu rai, hodi nune’e ema hotu la’o ho livre,” Agustinho da Cruz Babo hateten.

Nia hatutan,  trotoar no estrada ku’ak sira ne’e konsidera fó ameasa ba ema nia vida liu-liu ba ema la’o ain sira bele hetan tohar.

Suku Santa Kruz iha populasaun hamutuk 7000-resin, iha Aldeia hamutuk 10, hanesan, Aldeia Murak, Beheda, Moris Foun, Audian, Nonoge, Loke Neon, 4 de Setembru, 12 de Novembru, 25 de Abril ho 7 Dezembru.

Reportajen ekipa Rafa.tl