Loja Balun Laiha Pesoál Parajen, Polísia Sei Koordena ho SERVE, I.P Halo Revizaun Ba Lisensa Komersiál

Polísia Tránzitu Seguransa Rodoviária Nasionál (POLTRANS) husu loja sira iha Dili laran atu koloka guarda parajen hodi regula transporte sira ne’ebé para iha loja hodi evita engrafamentu. Imajen/Rafa.tl

DILI, RAFA.tl– Polísia Tránzitu Seguransa Rodoviária Nasionál identifika loja barak iha kapitál Díli seidauk koloka pesoál parajen iha área loja oin, tanba ne’e, sei koordena ho Servisu Rejistrasaun no Verifikasaun Emprezariál, Institutu Públika (SERVE I.P) halo revizaun ba lisensa komersiál ba empreza sira bainhira atu loke loja presiza kria mós kondisaun ba fatin estasionamentu.

Notísia Relevante:POLTRANS Husu Loja Sira iha Dili Koloka Guarda Parajen Hodi Regula Transporte no Evita Engrafamentu 

Xefe Departamentu Kordenasaun Jestaun Risku ba Formasaun Edukasaun Sívika, Superintendente Asistente Polísia Domingos Sarmento Gama, ba Rafa.tl, Tersa (20/01/2026) hatete, Polísia Tránzitu kontinua halo kontrolasaun ba transporte sira ne’ebé para arbiru iha loja oin, tanba loja na’in sira la kumpri regra hodi monta pesoál parajen, ikus mai hamosu engrafamentu.

“Tinan kotuk ita fó ona treinamentu ba sira nia pesoál estasionamentu, no ita fó ona formasaun ba pesoál sira atu koloka asegura movimentu sira, liu-liu ba estasionamentu sira, kuandu sira iha ona, bele orienta estasionamentu para oinsá bele kanaliza labele mosu engrafamentu, realidade ita rasik kontrola beibeik ba loja sira para tenke tau sira nia seguransa parajen, maibé balun kumpri no balun la kumpri  nafatin, tanba ida ne’e mak iha loron hirak liu ba ita haré ita nia maluk empreza loja Xineja sira barak mak la interese hodi kumpre regras ne’ebé ita implementa,” Superintendente Asistente Polísia Domingos Sarmento Gama esplika.

Superintendente Asistente Polísia ne’e hatutan, Polísia Tránzitu sei ko’alia ho Asosiasaun Emprezariál Xinés kona-bá regra tránzitu ba fatin estasionamentu.

Nia afirma, iha observasaun unidade Tránzitu nian, emprezáriu sira loke loja iha Kapitál Díli  maioria la uja sira ninia pesoál estasionamentu.

Parte Tránzitu mós sei ko’alia ho Serve, I.P, hodi halo mudansa ba rekizitu ba emprezáriu sira, bainhira atu loke loja ruma presija kria mos kondisaun estasionamentu.

“Tanba loron ba loron ne’e ita hatene númeru transporte aumenta, ita nia emprezária loja sira mos aumenta loke, ne’e mak ami sei tenta oinsá mak bele hasoru Diretór Serve atu husu kritériu balun tenke enkaixa iha laran, wainhira sira atu loke loja ruma iha Kapitál Díli tenkiser iha armajen. Bainhira kompradór sira ba kompra sasán ruma iha ne’ebá, pasa de’it billete, depois ba karegamentu ne’e iha armajen,” Nia informa.

Iha fatin seluk, pesoál estasionamentu Loja Hadomi, iha Área Hudi laran, suku Bairu-Pité, Abrão Batista Nunes hatete, durante ne’e nia manda transporte sira ne’ebé ba para iha loja oin, maibé iha motorista balun lakoi halo tuir.

“Dadér tuku 8:00 loja loke, ema mai, ha’u hamrík to’o loraik tuku lima hodi haruka ema sira lori motór ho kareta sira para halo di’ak, maibé ita ko’alia ba sira, balun lakoi para tama, no balun para de’it iha estrada sorin, entaun Polísia mai foti sira balun nia kareta ho motór, tanba para de’it iha estrada, lakoi tama,” Abrão Batista Nunes hateten.

Xefe Suku Santa Kruz, Marciano Juvinal, lamenta ho pesoa sira ne’ebé uza transporte ba sosa sasán iha loja, sira para arbiru hodi prejudika engrafamentu, tanba ne’e presija Polísia Tránzitu atu tau atensaun.

“Hanesan iha Suku Santa Kruz ne’e iha parte Audian ne’ebá loja oin ne’e, ema balun monta ona guarda parajen, maibé ema balun kontinua para arbiru , tanba ne’e loja na’in tenke kria kondisaun, nune’e labele para arbiru, tanba ne’e ami rekomenda ba Polísia Tránzitu tenke foti medida, tanba tuir lei dehan, labele prejudika fatin públiku.”hatete Marciano Juvinal.

Tuir Observasaun Rafa.tl iha terenu hatudu katak, iha loja barak hanesan iha área Comoro, Fatuhada, Aimutin, Colmera, Audian, Bidau no mos fatin seluk, la kumpri regra Tránzitu. La monta pesoál parajen hodi halo atendimentu ba fatin estasionamentu iha loja oin.

Reportajen ekipa Rafa.tl