Assalam F.C Rekolla Pontu Tolu no Lidera Tabela Klasifikasaun Grupu B Hafoin Manán DIT F.C 2-1

Jogadór Assalam FC Lázaro Ximenes simu kartaun mean hafoin halo falta hasoru guarda rede DIT F.C iha jogu Taça da Liga 2025, Domingu (18/01/2026). Imajen/Rafa.tl

DILI, RAFA.tl– Assalam F.C rekolla pontu tolu iha jogu dahuluk Taça da Liga 2025 no lidera provizoriamente tabela klasifikasaun grupu B hafoin manán DIT F.C ho skor 2-1.

Notísia Relevante: Taça da Liga FFTL, Assalam F.C Preparadu no iha Ambisaun Rekolla Pontu Tolu Kontra DIT F.C

Iha jogu ne’ebé hala’o iha Estádiu Munisipál Díli, Domingu (18/01/2026), ekipa Assalam F.C no DIT F.C iha ambisaun atu domina jogu hodi konkista vitória ba ekipa ida-idak nian.

Tama ba minutu tolu, ekipa DIT F.C halo kedas presaun ba Assalam F.C hodi lansa ameasa ida ne’ebé atu rezulta golu, maibé guarda rede Assalam F.C konsege salva bola ne’ebé iha.

DIT F.C kontinua halo presaun ba Assalam F.C ho tátika ne’ebé iha, maibé ekipa adversáriu la nonók no kontinua buka oportunidade hodi sai husi presaun no halo balansu ba jogu no halo kontra atake.

Hakat ba minutu 13, ekipa Assalam F.C liu husi kapitaun ekipa Martinho Belo marka golu ida hodi muda skor iha tabela ba 1-0 no lori Assalam F.C lidera jogu ne’e.

Ekipa rua kontinua halo jogu atrativu, maibé ekipa Assalam F.C obrigadu tenke joga de’it ho jogadór 10 hafoin iha minutu 18 jogadór Lázaro Ximenes sofre kartaun mean hafoin halo falta hasoru guarda rede DIT F.C.

Hafoin kartaun mean ne’e, ekipa Assalam F.C komesa hatún nia intensidade jogu hodi mantein no halo jogu barak liu iha nia área no ekipa DIT F.C aproveita oportunidade másimu atu halo impata, maibé sorte aat kontinua aumenta ba DIT F.C no Assalam F.C marka tan golu ida iha minutu 34 liu husi jogadór Emílio Casmiro hodi muda skor ba 2-1.

Ekipa DIT F.C kontinua halo esforsu no mudansa ba tátika no tékniku ne’ebé iha, ikus mai marka golu ida liu husi jogadór Elvis da Silva iha minutu 43 hodi muda skor iha tabela klasifikasaun.

To’o primeira parte termina, ekipa rua la iha ida mak aumenta tan golu hodi muda skor iha tabela, nune’e Assalam F.C mantein lidera ho skor 2-1.

Tama ba segunda parte, ekipa rua kontinua halo mudansa ba tátika no DIT F.C hasa’e liután sira nia intensidade jogu hodi halo presaun ba ekipa Assalam F.C. Maske joga ho jogadór na’in 10, ekipa Assalam F.C mantein jogu ho kalma no disiplina hodi asegura pontu ne’ebé iha.

Tama ba minutu 70, DIT F.C mos obrigadu tenke joga ho jogadór 10 hafoin Nelson Boavida hetan kartaun mean, hafoin lansa sutu ba jogadór adversáriu to’o monu iha kampu laran.

Ekipa DIT F.C no Assalam F.C joga ho jogadór 10 to’o tempu termina no ho vitória ne’e, Assalam F.C provizoriamente lidera tabela klasifikasaun grupu B no DIT F.C hela iha zona mean.

Treinadór Assalam F.C, Adu Marques Nami Ruru, agradese  ba nia jogadór sira ho vitória ne’e maske antes ne’e nia ekipa joga de’it  ho jogadór na’in 10 tanba jogadór ida hetan kartaun.

“Ha’u kontenti no agradese antes ne’e ha’u ko’alia ona iha konferénsia pers katak ami sei prepara másimu no iha konfiansa ba ami nia jogadór sira no optimizmu sei manán DIT FC hodi hetan trés pontus, maibé ohin jogu primeiru 15 no 20 minutu ami hetan uluk ona kartaun mean, halo Treinadór oinsá para muda fali tátika hodi hasoru DIT tanba ami menus ema ida, maibé ha’u iha maneira no tátika, estratéjia rasik hodi muda jogu hodi mantein  oinsá atu bele manán nafatin ho 2 a 1 hodi hetan trés pontus, tanba pontus ne’e mak importante mai ha’u, maske ha’u nia jogadór sira kartaun mean iha primeiru kedas,”Treinadór Assalam F.C, Adu Marques Nami Ruru hateten.

Treinadór DIT F.C, Alexandre Cham, rekoñese  nia ekipa nia esforsu maibé ho aleza ne’ebé baliza hetan sai impaktu ba derota ne’ebé DIT F.C.

“Hanesan ita hotu hatene, ohin ami nia jogadór hotu esforsu másimu, no ita haré katak jogu ne’e  atu bele dehan ami domina, maske ami derota tanba iha fallansu, no fallansu ne’e mai duni husi ami nia jogadór balun, depois de ami nia baliza primeiru sai ha’u hanoin ne’e problema ida  sériu ba ekipa, maibé pasiénsia ho ekipa ne’ebé ha’u lidera agora ha’u fó oportunidade ba baliza segundu atu substitui. Ha’u hanoin ba oin ami sei prepara di’ak liu tan iha jogu segundu no ha’u fiar katak ami sei fila-fali ho ami nia performa ne’ebé di’ak no hetan rezultadu di’ak,” Alexandre Cham informa.

Tuir oráriu jogu ba grupu B nian, DIT F.C sei joga kontra Nagarjo F.C iha loron 25 fulan-janeiru, no Assalam F.C sei hasoru Nagarjo F.C iha loron 31 fulan-Janeiru ne’e iha Estádiu Munisipál Díli.

Reportajen ekipa Rafa.tl