MCAE Sei Koordena ho Ministériu Hotu Hodi Konsentra Ba Hasa’e Kresimentu Ekonómia iha Timor-Leste

Vise Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay hala'o sorumutuk ho Prezidente Repúblika, José Ramos-Horta iha Palásiu Preizdensiál, Kuarta (14/01/2026). Imajen/Rafa.tl

DILI, RAFA.tl– Ministériu Koordenadór asuntu Ekonomia no Ministériu Turizmu no Ambiente iha kompromisu forte atu koordena ho ministériu hotu hodi konsentra ba kresimentu ekonómia Timor-Leste ba oin.

Vise Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay ba jornalista sira iha Palásiu Prezidensiál, Kuarta (14/01/2026), hatete, ba oin tuir programa ne’ebé mak aprova tiha ona hosi Parlamentu Nasionál  sei kontinua la’o nafatin no mós atualiza situasaun sobre Timor-Leste nia situasaun ekonomia hanesan momentu tanba ho situasaun Mundiál ne’ebé mak agora akontese, tanba ne’e  konsentra ba uma laran de’it.

“Tuir Primeiru Ministru nia orientasaun ba iha membru governu hotu-hotu katak, tinan ida ne’e tinan asaun, ne’ebé ami konsentra liu-liu atu dudu ekonomia ba oin. Ne’ebé ha’u nia servisu mak ida ne’e, ha’u sei koordena nafatin ho Ministériu sira seluk hodi ko’alia liu kona-bá asuntu ekonomia nian, hanesan parte Agrikultura, Telekomunikasaun, Peska, Floresta no mós área sira seluk,”  Vise Primeiru-Ministru no Ministru Koordenadór  ba Asuntu Ekonomia no Ministru Turizmu no Ambiente, Francisco Kalbuadi Lay, hato’o lia hirak ne’e, hafoin hasoru malu ho Prezidente Repúblika José Ramos -Horta iha Palásiu Prezidensiál Aitarak-Laran Díli kuarta (14/01/2026).

Primeiru Vise-Primeiru-Ministru ne’e haktuir, kona-bá investór hira mak atu mai investe iha Timor-Leste, nia seidauk garantia hira mak atu mai, maibé nafatin buka meios hodi atrai investór sira mai investe iha Timor-Leste.

“Ha’u seidauk bele  garantia investór hira, maibé halo nafatin meius para bele atrai investór sira mai iha ita nia rai, tanba prioridade agora mak ba ekonomia ne’ebé área hotu-hotu importante maibé liu-liu ita konsentra liu investimentu, hanesan Primeiro Ministru ko’alia bei-beik ona ba ita boot sira, iha tinan ida ne’e sei kria banku dezenvolvimentu nasionál ida, ne’e mós atu fasilita ita nia emprezáriu lokál sira atu dudu ekonomia la’os de’it iha nasionál, maibé to’o iha baze”. Tenik nia.

Governante ne’e informa mos katak, hasoru malu ho Prezidente Repúblika ne’e atu relata hela servisu ne’ebé mak atu hahú ba oin atualiza mos situasaun hotu-hotu, liu-liu agradese mos ba Prezidente Repúblika José Ramos -Horta iha tinan 2025 ne’ebé Palácio Prezidensiál iha kooperasaun lubuk ida hamutuk ho Ministériu Turizmu no Ambiente liu-liu iha atividade desportivu no atividade Kulturál.

Reportajen ekipa Rafa.tl