Embaixadór Yamamoto Yasushi Entrega Karta Kredensiál Ba Prezidente Ramos-Horta

Moradór sira simu Embaixadór foun Japaun nian mai Timor-Leste, Yamamoto Yasushi iha arredores Palásiu Prezidensiál molon entrega karta kredensiál ba Prezidente Repúblika, José Ramos-Horta, Sesta (09/01/2026). Imajen/Rafa.tl

DILI, RAFA.tl– Embaixadór foun Japaun nian mai Timor-Leste,  Yamamoto Yasushi, Sesta (09/01/2026), entrega karta kredensiál ba Prezidente Repúblika, José Ramos-Horta.

Serimonia solene ne’ebé hala’o iha Palásiu Prezidensiál  ne’e, Xefe Estadu Timor-Leste, José Ramos-Horta fó benvindu ba Embaixadór Yamamoto Yasushi no hateten Japaun nia amizade no apóiu ne’ebé la nakdoko dezde Timor-Leste nia independénsia sai fundamentál ba nasaun nia trajetória.

“Ha’u iha konfiansa katak, iha Embaixadór Yamamoto nia lideransa, ita sei haré ita nia kooperasaun sai kle’an liután, partikularmente iha área infraestrutura, enerjia renovável no investimentu privadu, hodi aproveita impulsu enkontru nível aas, foin lalais ne’e no kompromisu partilladu ba rejiaun ida ne’ebé pasífika no próspera,” Prezidente Repúblika José Ramos-Horta hateten.

Dezde estabelese relasaun diplomátika iha tinan 2002, Timor-Leste no Japaun harí ona parseria ida ne’ebé sólida bazeia ba respeitu ba malu no fahe valór sira  nu’udár nasaun marítima sira ho istória reziliénsia nian.

Japaun sai hanesan apoiante importante ida ba Timor-Leste nia dezenvolvimentu, fornese asisténsia iha matéria infraestrutura, saúde, edukasaun no redusaun risku dezastre nian, no protesaun ambientál, entre sira seluk, liuhosi Ajénsia Kooperasaun Internasionál Japaun (JICA), organizasaun internasionál sira no ONG Japoneza no Timor-oan sira.

Liu husi vizita sira ho nível aas hosi Primeiru-Ministru Kay Rala Xanana Gusmão, iha fulan-Dezembru tinan 2023 no Prezidente José Ramos-Horta, iha fulan-Agostu tinan 2025, relasaun bilaterál sira hetan elevasaun ba “Parseria Abranjente”.

Kooperasaun dezenvolvimentu nian avansa maka’ás, ne’ebé marka ho konstrusaun enfermaria ospitalár foun no sentru partu 20, hamutuk ho konstrusaun futuru terminál aeroportu ida no konkluzaun projetu infraestrutura rurál hamutuk 155 iha tinan-tolu ikus ne’e.

Inisiativa importante sira mós habelar ona, hanesan programa kuda ai-funan fresku no investimentu boot Japaun nian iha konstrusaun ró no enerjia solar. Aleinde ne’e, interkámbiu interpesoál liu husi programa estájiu, interkámbiu akadémiku no vizita foin-sa’e sira kontinua hametin liután ligasaun entre nasaun rua ne’e.

Ministru Negósiu Estranjeiru no Koperasaun (MNEK), Bendito dos Santos Freitas ba jornalista sira hatete, Embaixadór foun Yamamoto Yasushi hanesan Embaixadór foun país Japaun nian ne’ebé mai troka Embaixadór sesante Kimura Tetsuya ne’ebé termina ona nia mandatu iha Timor-Leste.

Governante ne’e hatutan, Governu Timor-Leste garante prezensa  Embaixadór foun Yamamoto Yasushi  lori nafatin esperansa ba Timor-Leste nia dezenvolvimentu.

“Ita hatene katak Timor-Leste iha relasaun importante teb-tebes no istóriku ho Governu Japaun, ne’ebé kooperasaun fundamentál iha área no setór hotu-hotu ho estabilidade dezenvolvimentu ekonomiku, sosiál no tanba ida-ne’e maka prezensa Embaixadór foun Yamamoto Yasushi sei dezempeña nia papel di’ak liután atu fó kontinuidade misaun ne’ebé Embaixadór anteriór husi Japaun hala’o tiha ona,” Nia subliña

Prezidente Repúblika José Ramos-Horta manifesta konfiansa tomak katak mandatu Embaixadór Yamamoto Yasushi nian sei hasa’e no sei reforsa lasu amizade no kooperasaun ne’ebé dura entre Timor-Leste no Japaun.

Reportajen ekipa Rafa.tl