PM Xanana Loke Sistema GRP Ba Ezekusaun OJE 2026

Primeiru-Ministru Kay Rala Xanana Gusmão. Imajen/Rafa.tl

DILI, RAFA.tl – Primeiru-Ministru (PM), Kay Rala Xanana Gusmão, Kinta (08/01/2026), ofisialmente loke hikas FreeBalance nia sistema Planeamentu Rekursu Governu ka Government Resource Planning (GRP) no husu Instituisaun Estadu sira bele hahú ezekuta Orsamentu Jerál Estadu (OJE) tinan 2026 ho responsabilidade.

Iha komunikadu ofisiál ne’ebé Rafa.tl asesa husi Gabinete Mídia Primeiru-Ministru Kay Rala Xanana Gusmão, Sesta (09/01/2026) haktuir, iha serimónia loke FreeBalance nia sistema Planeamentu Rekursu Governu  ka GRP ne’e akompaña hosi Ministra Finansas, Santina José Rodrigues Cardoso ho Prezidente Komisaun Funsaun Públika (KFP), Agostinho Letêncio de Deus iha Ministériu Finansas (MF).

“Tinan foun ida ne’ebé tenke nakonu ho responsabilidade, kompromisu no onestidade atu serbí. Tenke iha espíritu atu kurize saida mak ladi’ak. Ha’u iha konfiansa katak, imi hotu simu responsabilidade ne’ebé ejize imi atu haka’as-an, la’ós atu sai ezemplu ida ba mundu maibé pelu menus ita la sai ezemplu aat ida. Tanba ne’e, dirijente sira iha área planeamentu, aprovizionamentu no finansas tenke tau iha ulun katak loos duni osan povu nian jere ho di’ak,” Primeiru-Ministru Kay Rala Xanana Gusmão hateten.

Xefe Governu hatutan, bainhira taka Konta Jerál Estadu (KJE) tinan 2025 nian iha item balun ezekuta menus tebes. Nia konsidera ida ne’e jerente sira la hatene ka hatene hela maibé la book-an.

Ho lisaun hosi ezekusaun OJE tinan 2024, 2025 no tinan ida mai ne’e, Primeiru-Ministru sei hatún hotu osan atu bele ezekuta. Se lae, hotu-hotu husu bei-beik maibé ezekuta la di’ak.

“Ne’e hatudu de’it katak ita la hatene ita-nia responsabilidade ba rai no povu ida-ne’e. Ba to’o Parlamentu Nasionál diskute malu no defende katak buat ne’e sei halo, maibé ikus mai la la’o. Tanba ne’e, dirijente sira tenke haré no kalkula didi’ak saida mak presiza,” Xanana afirma.

Tinan 2026, PM Xanana sei la’o hale‘u munisípiu hotu-hotu hodi haré kbiit preparasaun kona-bá planeamentu, aprovizionamentu no finansas nian.

Sistema GRP hosi FreeBalance mak plataforma software ne’ebé Governu utiliza hodi implementa ho objetivu atu ajuda halo jestaun finanseira, kontabilidade, assembleia kontas no halo auditoria nasionál ne’ebé hatúr solusaun di’ak ba Governu hodi halo monitorizasaun no kontrola rekursu sira.

Iha oportunidade ne’e mós parte Ministériu Finansas halo desiminasaun kona-bá regras no prosedimentu hosi Dekretu-Lei ba regulamentasaun Lei Enkuadramentu Orsamentál (LEO), ezekusaun OJE 2026 no Aprovizionamentu inklui sirkulár avizu autorizasaun despezas no kontrolu orsamentais ba jestór sira área Jestaun Finansas Públikas inklui entrega orsamentu aprovadu 2026 ba instituisaun Estadu sira.

Reportajen ekipa Rafa.tl