2025, Polísia Rejista Totál Asidente 2224 Ne’ebé Rezulta Ema Na’in-114 Lakon Vida

Xefe Departamentu Koordenasaun Jestaun Risku ba Formasaun Edukasaun Sívika, Superintendente Asistente Polísia Domingos Sarmento Gama (klaran). Imajen/Rafa.tl

DILI, RAFA.tl – Xefe Departamentu Kordenasaun Jestaun Risku ba Formasaun Edukasaun Sívika, Superintendente Asistente Polísia Domingos Sarmento Gama, informa relatóriu Polísia Tránzitu Seguransa Rodoviária Nasionál kona-bá rekapitulasaun asidente viasaun husi loron 01 fulan-Janeiru to’o  loron 31 fulan-Dezembru tinan 2025 ne’ebé akontese iha territóriu Timor-Leste hamutuk 2224 no rezulta ema na’in-114 lakon vida.

“Relatóriu anuál  hahú husi loron 01 fulan-Janeiru to’o loron 31 fulan-Dezembru  2025 ba kazu asidente iha teritóriu Timor-Leste hamutuk 2.224 ne’ebé rezulta ema na’in-114 lakon vida,” Superintendente Asistente Polísia Domingos Sarmento Gama, ba jornalista sira iha Ministériu Interiór, Díli, Kinta (08/01/2026).

Superintendente Asistente Polísia ne’e hatutan, ba ema kanek todan 411, kanek kaman hamutuk ema na’in-2.625. Signifika ba kazu asidente ne’e konsidera kazu númeru as tanba ema lakon vida kada tinan atus ida ba leten.

Nia subliña, kona-bá kazu asidente sira-ne’e ninia fatór husi ema porsentu 90, signifika motorista sira ladún iha atensaun ba movimentu viajen sira, entaun iha parte fatór ba karreta porsentu lima (5%), fatór ba kondisaun estrada porsentu lima  (5%) no fatór ba natureza laiha.

Kauza  husi asidente ne’e mós barak liu akontese tanba,sidadaun sira ne’ebé kondús transporte, liu-liu motór ho karreta seidauk iha konsiénsia atu kumpre regra tránzitu.

“Oinsá atu minimiza númeru hirak ne’ebé iha ne’e, ita presiza sensibiliza lei kódigu estrada númeru 6/2003 ne’e ba estudante sira, maske antes ne’e halo ona sensibiliza, maibé rezultadu maka nafatin  konsidera sidadaun sira ne’ebe hanesan motorista sira maka laiha konsiénsia, ne’e mak ita husu sira atu kondús  transporte presiza kuidadu aan no atensaun,” Superintendente Asistente Polísia Domingos Sarmento Gama hateten.

Durante iha 2025 ne’e Polísia Tránzitu Rodoviária Nasionál rejistu asidente ne’ebé akontese ho númeru as liu Munisípiu Díli hamutuk 1297, tuir mai Liquiça (216), Baucau (160), Aileu (122),  Manatuto (110), Bobonaro (86),  Covalima (72), Ermera (54), Manufahi, (43), Lautém (21), Viqueque (19), Ainaro (16), Oé-Cusse (6) no Ataúro iha kazu  rua (2).

Superintendente Asistente Domingos Sarmento Gama kompromete ba tinan ne’e Polísia Tránzitu Seguransa Rodoviária Nasionál  fó ona orientasaun ba Polísia Tránzitu kada Komandu Munisípiu atu halo operasaun liu husi pasa revista  maka’as ba transporte, nune’e bele evita ka prevene asidente.

Reportajen ekipa Rafa.tl