Governu Timor-Leste Aprova Planu Estratéjiku Ba Seguransa Interna 2011–2040

Serimonia hasa'e Bandeira Nasionál iha Palásiu Governu. Imajen/Média GPM

DILI, RAFA.tl– Governu Timor-Leste liu husi Reuniaun Konsellu Ministru sira nian, Kuarta (07/01/2026), aprova projetu Rezolusaun Governu nian, ne’ebé aprezenta hosi Ministru Interiór ,Francisco da Costa Guterres, kona-bá Planu Estratéjiku ba Seguransa Interna 2011–2040.

Notísia Relevante: Governu Aprova Regulamentu Aplikasaun Kódigu Aprovizionamentu no Kontratu Públiku

Iha komunidade ofisiál ne’ebé Rafa.tl asesa husi Gabinete Mídia Primeiru-Ministru Kay Rala Xanana Gusmão, haktuir  planu ida-ne’e estabelese enkuadramentu estratéjiku longu prazu nian ba traballu hosi Ministériu Interiór no komponente sira seluk hosi Sistema Seguransa Interna nian, ne’ebé hatudu kompromisu hosi Governu Konstitusionál IX hodi promove ambiente dame, estabilidade no seguransa, nu’udár kondisaun esensiál sira ba dezenvolvimentu sósiu-ekonómiku sustentável Timor-Leste nian.

Dokumentu ne’e kria bazeia ba nesesidade atu atualiza no aliña fali planu estratéjiku anteriór, tuir dezafiu seguransa interna nian ne’ebé evolui no lisaun sira ne’ebé aprende durante períodu ne’e.

Planu Estratéjiku ba Seguransa Interna 2011–2040 bazeia ba vizaun ida kona-bá futuru ne’ebé projeta nasaun ida ne’ebé sidadaun sira moris iha dame nia laran, livre husi ta’uk no integradu iha ambiente komunidade ne’ebé seguru no progresivu.

Atu realiza vizaun ida ne’e, define misaun klaru ida ba Ministériu Interiór, ne’ebé foka liubá planeamentu, koordenasaun, ezekusaun no avaliasaun ba polítika seguransa interna, ne’ebé orienta hosi prinsípiu hanesan respeitu ba valór konstitusionál sira, prevensaun, imparsialidade, inkluzividade, artikulasaun institusionál no ligasaun entre seguransa no dezenvolvimentu.

Planu ne’e organiza tuir faze no fahe ba períodu estratéjiku tolu — 2026-2030, 2031-2035 no 2036-2040 — no bazeia ba pilár tranzversál haat: hadi’a kondisaun servisu, hametin kualidade prestasaun servisu nian, konsolida enkuadramentu legál no hametin parseria ho komunidade no mós parseiru nasionál no internasionál sira.

Pilár sira ne’e fó apóiu ba dezenvolvimentu kapasidade sira husi instituisaun sira ne’ebé iha, tutela husi Ministériu Interiór, inklui Polísia Nasionál Timor-Leste, Servisu Migrasaun, Autoridade Protesaun Sivíl no estrutura sira seluk ne’ebé relevante iha ámbitu seguransa interna nian.

Planu ne’e mós rekoñese relasaun besik entre seguransa no dezenvolvimentu, hodi integra resposta ba dezafiu sira hanesan krime transnasionál, risku dezastre naturál no fatór sosioekonómiku sira ne’ebé influénsia estabilidade sosiál.

Iha kontestu ida-ne’e, hametin kooperasaun bilaterál no multilaterál, hodi aliña ho kompromisu rejionál no internasionál, partikularmente iha ámbitu ASEAN, g7+ no Objetivu Dezenvolvimentu Sustentável, liu-liu ODS 16.

Implementasaun Planu Estratéjiku ba Seguransa Interna 2011–2040 sei lidera no koordena husi membru Governu ne’ebé responsável ba seguransa interna, iha artikulasaun (servisu hamutuk) ho ministériu, órgaun soberania, autoridade lokál, parseiru internasionál, sosiedade sivíl no komunidade sira seluk, no sei sujeita ba mekanizmu monitorizasaun no avaliasaun regulár.

Ho desizaun ida ne’e, Governu fó ba nasaun ne’e, instrumentu orientadór ida ne’ebé klaru no abranjente atu hametin seguransa interna no kontribui ba Timor-Leste ida ne’ebé seguru, estável no prósperu liu.

Reportajen ekipa Rafa.tl