Servisu Migrasaun Rejista Ema 412.173 Sai Husi Teritóriu Timor-Leste

Timoroan sira sai husi teritóriu Timor-Leste liuhosi postu fonteira Batugade iha ámbitu feriadu Natal no Tinan Foun. Imajen/Rafa.tl

DILI, RAFA.tl-Diresaun Jerál Servisu Migrasaun rejista ema hamutuk 412.173 sai husi teritóriu nasionál Timor-Leste durante tinan 2025.

Notísia Relevante: 2025, Servisu Migrasaun Kontribui Reseita Ba Estadu US$2,480,820.00

Sidadaun sira ne’e sai husi fronteira terestre no aeroportu Internasionál Prezidente Nicolau Lobato, Comoro, Díli.  Além de ne’e, Servisu Migrasaun mós rejista sidadaun estranjeiru hamtuk 396.290 mak tama mai teritóriu nasionál liu husi fronteira terestre no aeroportu.

Diretora Jerál Servisu Migrasaun, Superintendente Asistente Polísia Adelaide da Rosa, ba jornalista sira iha nia knaar fatin, Ministériu Interiór,  Díli, Kuarta (07/01/2026) informa, dadus anuál ne’ebé maka iha tinan 2025 pesoál sira ne’ebé durante ne’e halo movimentu tama no sai iha teritóriu nasionál Timor-Leste ho totál 808.463.

Nia esplika  katak entre númeru ne’e ema ne’ebé tama mai iha teritóriu nasionál ho totál 396.290 no sidadaun ne’ebé sai husi teritóriu nasionál hamutuk 412.173.

“Iha kontrolu fronteira nian movimentu ema tama no sai husi teritóriu nasionál la’o normal no sempre kontrola ho másimu atu garante vijilánsia ba iha seguransa país nian,” Diretora Jerál Servisu Migrasaun, Superintendente Asistente Polísia Adelaide da Rosa informa.

Nia hatutan, husi númeru ne’ebé iha, Servisu Migrasaun mós halo rekuza entrada ba sidadaun estranjeiru hamutuk 126, fó mós repatriasaun ba sidadaun estranjeiru hamutuk 38 ne’ebé fila ba sira nia nasaun orijen, violénsia doméstika hamutuk 26, no mate-isin hamutuk 12.

Nia subliña, emisaun vistu ba ema hamutuk 11.797, extensaun vistu hamutuk 9.355, emisaun autorizasaun vistu husi adidu migrasaun sira iha rai-li’ur hamutuk ema 1.583 ne’ebé konsege produs mós reseita Estadu hamutuk rihun atus ida resin.

Iha prosesu admistrativu hamutuk 399, espulsaun ema na’in ida, prosesu krime hamutuk ema na’in-35 no abandonadu voluntáriu hamutuk 116, totál kazu hotu-hotu hamutuk 585 no servisu migrasaun konsege reduz númeru kazu 2025 nian kompara ho 2024.

Reportajen ekipa Rafa.tl