PNTL ho Xefe Suku Caicoli Buka Solusaun Ba Uma-Kain Haat Ne’ebé Afetadu Ba Konstrusaun Kuartel Jerál PNTL

Dezeñu edifisiu Kuartel Jerál PNTL iha Caicoli, Dili. Imajen/Dok.Rafa.tl

DILI, RAFA.tl– Komandante Jerál Polísia Nasionál Timor-Leste, Komisáriu Jerál Polísia Henrique da Costa,  Tersa (06/01/2026), hasoru malu ho Xefe Suku Caicoli, Hipólito Marques Sarmento ho advogadu hodi buka solusaun ba komunidade ne’ebé afetadu ba alargamentu konstrusaun foun Kuartel Jerál PNTL.

Notísia Relevante: Governu Hatuur Fatuk Dahuluk Ba Konstrusaun Edifísiu Kuartél Jerál PNTL ho Kustu US$13,228,909,78

“Ami ko’alia ho Xefe Suku ho mós Advogadu, depois ida-ne’e sira fila ba ko’alia fali ho komunidade afetadu uma kain haat ne’ebé maka to’o agora seidauk iha solusaun, depois maka sira aprezenta fila-fali mai iha Komandu PNTL, ita bele kontinua ba iha Ministériu Justisa. Buat ne’ebé ita husu ba Xefe Suku ho advogadu no komunidade sira iha ne’ebá katak PNTL presiza duni fatin ne’ebá, hodi halo konstrusaun ba iha Kuartel Jerál PNTL nian, depois iha mós estrada tama husi parte ne’ebá, husu ba sira para apóiu PNTL ho governu,  PNTL presiza duni,” Komisáriu Jerál Polísia Henrique da Costa  informa ba jornalista sira hafoin hasoru malu ho Xefe Suku Caicoli iha Komandu Jerál PNTL.

Iha sorumutu ne’e mós parte Komandu Jerál PNTL fó opsaun rua ba komunidade afetadu sira atu deside halo indemizasaun troka ho rai ka atu  fó osan.

“Ida ne’e aprezenta ba la’ós husi PNTL maka deside, maibé ita halo komunikasaun ho sira parte Teras ho Ministériu Justisa nian, tanba ne’e nafatin entrega ba iha sira, para deside. PNTL hakarak uza rai ida Cacoli agora dau-daun halo konstrusaun ba edifísiu foun Komandu Jerál PNTL,” Komisáriu Jerál Polísia Henrique da Costa   hateten.

Iha fatin hanesan Xefe Suku Caicoli, Hipólito Marques Sarmento hatete, hasoru malu ho Komandante Jerál PNTL ne’e hodi rona rezultadu ba rai, maibé depende fali ba komunidade afetadu sira nia desizaun.

“Iha buat rua mak ohin ami rona katak komunidade sira hakarak rai, rai iha, hakarak osan depois osan mós iha. Ne’ebé ami ko’alia ho Komandante Jerál PNTL, atu nune’e, advogadu ho ha’u sei fila-fali ba iha ne’ebá atu rona took komunidade sira-nia hakarak ne’e saida,” Xefe Hipólito Marques Sarmento hateten.

Autoridade lokál ne’e afirma, rai ne’ebé PNTL prepara ba afetadu sira iha fatin tolu, maibé depende fila sira atu deside, mak hanesan iha Metinaro, Hera ho Tibar.

“Se komunidade la simu  opsaun rai ne’ebé Governu prera maka opsaun ida mak osan, no kona-bá osan nia montante seidauk hatene,” Hipólito Marques Sarmento informa.

Hanesan informa nanis ona katak konstrusaun ba edifísiu foun Kuartel Jerál PNTL ho orsamentu US$13,228,909.78 ne’ebé ezekuta husi empreza internasionál Shanghai Construction Group Co,Ltd husi Xina.

Obra ne’e halo tiha ona lansamentu ofisiál liuhosi hatuur fatuk dahuluk husi Primeiru-Ministru (PM), Kay Rala Xanana Gusmão, Komandante Jerál PNTL, Komisáriu Jerál Polísia Henrique da Costa ho mós Embaixadora Xina mai Timor-Leste, Wang Wengli iha Kuarta, 12 fulan-Novembru tinan 2025.

Reportajen ekipa Rafa.tl