Kazu Asaltu Malu iha Ainaro ho Baucau, PNTL Aprezenta Ona Ba Ministériu Públiku

Porta-voz Komandu Jerál Polísia Nasionál Timor-Leste (PNTL), Superintendente Polísia João Belo dos Reis. Imajen/Rafa.tl

DILI, RAFA.tl– Polísia Nasionál Timor-Leste (PNTL) aprezenta ona kazu asaltu malu entre joven sira ne’ebé akontese iha Munisípiu Ainaro ho Munisípiu Baucau ba Ministériu Públiku hodi kontinua ba prosesu justisa tuir lei ne’ebé vigora.

Notísia Relevante: Polísia Husu Motorista Nafatin Kumpri Kódigu Estrada no Bandu Tula Pasajeiru Liu Karreta Nia Kapasidade

Porta-voz Komandu Jerál Polísia Nasionál Timor-Leste (PNTL), Superintendente Polísia João Belo dos Reis, Segunda (05/01/2026), informa ba jornalista iha Kuartél Jerál PNTL, informa situasaun jerál iha teritóriu nasionál durante selebrasaun Natal no pasajen tinan tuan 2025 ba tinan foun 2026, PNTL rejista kazu insidente ne’ebé asalta malu entre joven sira iha Munisípiu Ainaro, Suku Manutasi no iha Munisípiu Baucau área Suku Bercoli, ne’ebé rezulta membru Polísia na’in-tolu hetan kánek no joven ida hetan tiru.

“Iha operasaun boot rua ne’ebé mak Polísia halo, liu-liu hasoru insidente iha Ainaro no insidente iha Ermera no seluk tan iha Baucau. Ami informa katak atuasaun ba insidente ne’ebé akontese iha Ainaro, identifika katak membru PNTL na’in-tolu husi Komandu Munisípiu Ainaro hetan kánek tanba hetan tiru ho arma branka, no suspeitu na’in-10 iha parte Ainaro nian mós identifikadu, no kazu ne’e aprezenta ona ba Ministériu Públiku (MP) Suai ho NUC: 0002/2026-PNSIK,” Superintendente Polísia João Belo dos Reis informa.

Porta-voz Komandu PNTL ne’e hatutan kona-bá kazu asalta malu entre joven sira iha área Bercoli, Suku Umane-Iku, Postu Administrativu Venilale, Munisípiu Baucau, rezulta joven ida hetan tiru husi Polísia.

“Kazu seluk ne’ebé akontese iha Munisípiu Baucau, bainhira iha perturbasaun Ordem Públika, joven sira asalta malu, Polísia atúa, hafahe sira no tiru gas, no gas ne’e rasik rabenta kona alin ida nia ain, tanba ne’e prosesu ba kazu ne’e mós sei la’o hela. Identifikasaun la’o  hela no kazu ne’e ami aprezenta ona ba Ministériu Públiku,” João Belo dos Reis hateten.

PNTL rejista mós insidente balun husi Komandu PNTL Munisípiu Ermera, ne’ebé rekolla mós informasaun husi vítima na’in-neen ne’ebé hetan kauza  husi sasán balun ne’ebé rebenta.

“Ida  seluk kazu Ermera nian, vítima identifikadu ema na’in-ne’en (6) no suspeitu sei iha faze investigasaun hela, identifika katak, vítima sira hetan kánek tanba kauza husi sasán balun maka rabenta, tanba ne’e investigasaun sei la’o hela, atu define katak ne’e gas maka nakfera ka fugetes, hodi rezulta ema sira ne’e kánek. Investigasaun sei la’o hela. Hodi bele identifika didi’ak, ne’ebé kazu ne’e rasik ami aprezenta ona ba Ministériu Públiku (MP),” T Superintendente Polísia João Belo dos Reis tenik.

Porta-voz Komandu PNTL deklara mós kazu insidente ida akontese iha Munisípiu Covalima (Suai) iha ne’ebé joven na’in-rua ho kondisaun lanu todan, halai motór ho velosidade  no soke malu, ikus mai joven na’in-rua ne’e mate iha fatin akontesimentu.

Mate-isin entrega ona ba família hodi hala’o prosesu fúnebre no mós insidente ida akontese iha área Manleu husi Diretór Diresaun Tránzitu, Seguransa Rodoviária Nasionál nia oan rasik mate tanba asidente mesak.

Reportajen ekipa Rafa.tl