Governu Aprezenta Relatóriu Preliminar Avaliasaun Kondisaun Mínima Munisípiu sira Ba Desentralizasaun no Podér Lokál

Ministru Administrasaun Estatál (MAE) Tomás do Rosário Cabral. Imajen/Rafa.tl

DILI, RAFA.tl–  Ministériu Administrasaun Estatál (MAE), Segunda (29/12/2025), realiza enkontru preliminar avaliasaun kondisaun mínima ba munisípiu sira hodi aprezenta ba Primeiru-Ministru Kay Rala Xanana Gusmão kona-bá rezultadu avaliasaun husi munisípiu 12 ba planu implementasaun polítika desentralizasaun no podér lokál iha tinan 2026.

Ministru Administrasaun Estatál (MAE) Tomás do Rosário Cabral, ba jornalista sira iha salaun INAP, Comoro, Díli, informa enkontru rua ne’ebé MAE organiza, ida uluk ne’e hamutuk ho PM Kay Rala Xanana Gusmão hodi aprezenta rezultadu husi avaliasaun kondisaun mínimu, no daruak nian mak reuniaun ho diretór munisípiu  sira kona-bá avaliasaun servisu anuál, hodi nune’e, iha tinan 2026 tenke servisu tuir rekomendasaun sira no servisu aprovizionamentu.

“Ekipa avaliasaun ba kondisaun mínimu ba tiha ona munisípiu sira, halo tiha levantamentu no rezultadu mai aprezenta preliminar ba Primeiru-Ministru depois sei lori ba aprezenta iha Konsellu Ministru. Tuir lei tenke aprova ho rezolusaun governu ida para bele implementa,’’ Ministru Tomás do Rosário Cabral hateten.

Governante ne’e haktuir, bainhira rezolusaun ne’e aprova ona iha Konsellu Ministru, sei passa ba iha Parlamentu Nasionál (PN) hodi regula tuir lei, katak se maka merese atu avansa ne’e desizaun iha Parlamentu Nasionál.

‘’ida ne’ebé maka ba ne’e desizaun Konsellu Ministru nian, se munisípiu 12 ne’e ba hotu mós Orsamentu Jerál Estadu tenke sa’e, tanba lei dehan katak 20% OJE tenke fó ba kraik, agora ita haré kapasidade finanseiru, mais di’ak liu ita fó tanba sira maka hela ho populasaun no povu iha kraik,’’ Tomás do Rosário Cabral subliña.

Ministru Administrasaun Estatál ne’e argumenta, relatóriu ida ne’e autoridade idak-idak sei lori fila ba munisípiu sira hodi jere, hodi haré tuir kondisaun ne’ebé sira submete.

Iha relatóriu ba avaliasaun kondisaun mínimu iha munisípiu lima maka di’ak liu (muito Bom) no munisípiu hitu maka avalia katak di’ak (Bom), maibé seidauk bele pronúnsia ba públiku kona-bá munisípiu sira ne’ebé kategora muito bom no bom.

Dau-daun ne’e Ministériu Administrasaun Estatál mós prepara hela kona-bá desentralizasaun munisipál no efetividade ba implementasaun podér lokál no agora sei iha avaliasaun, sei iha nafatin avaliasaun lori ba konsellu ministru atu hetan aprovasaun.

Reportajen ekipa Rafa.tl