Kadetes PNTL Sei Kontinua Teste Saúde

Kadetes PNTL tuir teste fiziku. Imajen/Rafa.tl

DILI, RAFA.tl– Prosesu rekrutamentu ba membru kadetes foun Polísia Nasionál Timor-Leste  tinan 2025 iha parte teste fíziku no psikolójiku sei termina iha loron 30 fulan-Dezembru, tinan ne’e, no ba kadetes sira ne’ebé hetan valór 60 ba leten sei pasa no kontinua ho teste saúde.

Notísia Relevante: Komisaun Rekrutamentu PNTL Distribui Matéria Ezame, La Admite Kandidatu Tarde

Porta-vóz Komisaun Juri ba  Rekrutamentu  ba PNTL  2025, Superintendente Polísia António da Luz, ba jornalista sira iha Sentru Formasaun Polísia (CFP-sigla portugés), Díli, Segunda (22/12/2025), esplika, kona-bá prosesu rekrutamentu PNTL ba tinan 2025 prosesu teste ba psikoteste ninian mak remata ona iha loron 04 fulan-Novembru liubá.  Nune’e, agora da-dauk kontinua ba teste fíziku ho entrevista sei hela munisípiu rua komposttu husi  Rejiaun Administrativu Espesiál Oé-Cusse Ambeno (RAEOA) no Munisípiu Viqueque.

“Durante prosesu teste ne’e, kandidatu sira esforsu, husi munisípiu sira kuaze hotu-hotu partisipa, tanba sira iha interese teb-tebes ba teste ida ne’e. Sira esforsu aan duni hakarak sai kandidatu ba  PNTL, maibé  ida ne’e hotu depende ba sira nia esforsu, se mak esforsu teste selesaun ne’e sei hetan valór ne’ebé mak di’ak.  Valór ne’e depende ba ema ida-idak nia esforsu, tanba iha kandidatu kuaze 12.000-resin ne’ebé mak partisipa selesaun ida ne’e,”, Superintendente Polísia António da Luz haktuir.

Porta-vóz  Komisaun Juri Rekrutamentu PNTL 2025 ne’e  garante prosesu rekrutamentu PNTL ne’e tuir kalendáriu ne’ebé fó sai tiha ona ba públiku no kandidatu sira.

Nia esplika, kadetes foun sira nia prosesu teste fíziku ho entrevista, depois ida ne’e mak akumulasaun ba valór sira. Tanba teste haat  hanesan prova kulturál, prova fíziku, entrevista no psikoteste sei tau hamutuk para hetan valór ikus  hira depois dividir ba haat (4), fahe fali ba teste haat ne’e foin hetan rezultadu ikus mak 60 ba leten.

“Se mak la atinji valór ida ne’e mak sira sei la passa.  Prosesu tuir mai ita sei fó sai ba sira ne’ebé mak valór termina tiha ona, no sira sei tuir selesaun tuir mai mak teste saúde,” nia hateten.

Komisaun rekrutamentu ne’e esplika, teste iha saúde ne’e mak eliminatóriu,  prova haat  Kulturál, fíziku, entrevista no psikoteste mak akumulativu. Se mak saúde la di’ak  ne’e prova médiku sei haré sira nia kondisaun hotu.

Superintendente Polísia ne’e subliña liután katak, tuir diploma ministerial presiza ema 400 de’it, se sira liu ona depende ba desizaun na’i ulun sira nian. Se sira mak dehan tinan oin sei tau orsamentu hanoin sei  bolu, mais se la iha ona ida ne’e mak desizaun la bele halo buat ida, komisaun halo tuir orientasaun ne’ebé mak haruka.

Reportajen ekipa Rafa.tl